Aksidentimi i një treni pranë kryeqytetit belg, Bruksel, i kushtoi jetën të paktën një personi dhe plagosi mbi 25 të tjerë.
Siç mësohet, një prej vagonëve është rrëzuar në një anë, pas daljes nga shinat. Aksidenti ndodhi në 13:20 të së dielës, pak pasi treni u nis me shpejtësi të ulet nga stacioni i Lëvenit drejt kryeqytetit. Ekipet e ndërhyrjes së shpejtë mbërritën menjëherë në vendin e ngjarjes. Autoritetet bënë me dije se shërbimet hekurudhore mes Lëven dhe Brukselit janë pezulluar. Kryeministri Charles Michel vizitoi zonën për t’u solidarizuar me viktimat dhe grupet e shpëtimit.
“Jam shumë i shqetësuar për dhjetëra personat e plagosur, disa prej të cilëve janë në gjendje të rëndë. Prania ime këtu është një mënyrë për t’u shprehur mbështetjen grupeve të shpëtimit të cilat reaguan me shpejtësi maksimale, e gjithashtu viktimave të këtij aksidenti”, tha kryeministri belg.
Qershorin e kaluar, të paktën 3 persona humbën jetën dhe 9 u plagosën në qytezën e Hermalle-sous-Huy, pranë Liezhit. Një tjetër aksident tronditi vendin në shkurt të vitit 2010, kur 18 persona vdiqën pas përplasjes së 2 trenave me pasagjerë në jugperëndim të Brukselit.
