Studiuesi i marrëdhënieve ndërkombëtare Shqiprim Pula komentoi në edicionin e pasdites në Syri Tv mbledhjen mes dy qeverive Kosovë-Shqipëri sot në Prishtinë. Pula tha se nuk është bërë një analizë për të parë cilat janë frytet e marrëveshjeve të firmosura mes palëve.
Analisti Shqiprim Pula u shpreh se nuk mjaftojnë buzëqeshjet dhe përqafimet mes palëve për të rregulluar marrëdhëniet, por Rama duhet të kuptojë rëndësinë e konsolidimit të shtetit të Kosovës dhe mbi këtë bazë, të largohet nga nisma ‘Ballkani i Hapur’.
“Sot kishim një numër mjaft të madh marrëveshjesh, 19 marrëveshje. Nuk u fol aspak në lidhje me marrëveshjet e nënshkruara në të kaluarën.
Kryeministri shqiptar njëherë e mirë duhet të kuptojë rëndësinë e nevojës së domosdoshme për Kosovën, konsolidimit të shtetit të Kosovës dhe mbi këtë bazë të anashkalojë Ballkanin e Hapur.
Nuk jemi kundër bashkëpunimeve rajonale, por s’mund të ketë bashkëpunime rajonale për aq kohë sa Serbia nuk kërkon falje dhe konteston shtetësinë e Kosovës apo shprehja haptazi pë ambicie territoriale ndaj Kosovës.”-deklaroi Pula.
Sakaq Pula deklaroi se Rama po i bën lavazh figurës politike të Aleksandër Vuçiç pa kërkuar falje ky i fundit ndaj Kosovës dhe pa u penduar për gjenocidin serb në Kosovë.
