Max Verstappen me Red Bull siguroi sot në mbrëmje “pole position” në pistën e Montreal, të vlefshëm për garën e Cmimit të Madh të Kanadasë në Formula 1. Piloti holandez, kampion bote në fuqi, dha kohën 1’21”299, kohë e realizuar në një pistë thuajse të lagur, për shkak të shiut që ra në pjesën e parë të provave zyrtare.
Surprizë vendi i dytë i pilotit spanjoll të Alpine, Fernando Alonso, që do ta nisë garën e nesërme nga vija e parë. Gjithsesi, ai ishte 7 të dhjetat më i avashtë se holandezi. Në vendin e tretë u klasifikua spanjolli Carlos Sainz me Ferrari. Ai u mundua të mbajë lart flamurin e “kokëkuqes” në këto prova, pasi shoku i tij i skuadrës do ta nisë nesër garën nga vendi i fundit.
Befasuan në këto prova zyrtare dy pilotët e Haas, me Kevin Magnussen (i pesti) dhe Mick Schumacher (i gjashti). Për pilotin e ri gjerman ky është rezultati më i mirë në karrierë në provat zyrtarer. Ata u renditën pas Lewis Hamilton me Mercedes, i katërti. Në “top-10″ u renditën edhe Esteban Ocon, George Russell, Daniel Ricciardo e Guanyu Zhou.
Provat e sotme zyrtare nisën në një pistë të lagur për shkak të shiut që po binte, por me kalimin e kohës pista u tha dhe kohët përmirësoheshin nga xhiro në xhiro. Kjo ndoshta ndikoi edhe në këtë renditje të pilotëve. Për t’u theksuar fakti se Leclerc do ta nisë nesër darën nga vendi i fundit (starti, ora 20:00), pasi ka ndryshuar motor. Edhe nesër mund të ketë reshje shiu, që do ta bënin interesante garën.
https://twitter.com/F1/status/1538271344529399808?ref_src=twsrc%5Etfw%7Ctwcamp%5Etweetembed%7Ctwterm%5E1538271344529399808%7Ctwgr%5E%7Ctwcon%5Es1_&ref_url=https%3A%2F%2Ftelesport.al%2Fverstappen-siguron-pole-ne-kanada-befasojne-alonso-e-mick-schumacher%2F
