Ministria e Mbrojtjes së Federatës Ruse ka publikuar shifrat e saj, të cilat nuk dihet sa të sakta mund të jenë, mbi ata që i konsideron si mercenarë apo luftëtarë të huaj që janë angazhuar në Ukrainë, nga momenti që nisi sulmi ushtarak rus mbi ukrainasit.
Sipas listës, e cila është shpërndarë edhe në faqen zyrtare të Ambasadës së Federatës Ruse në Tiranë, pretendohet se si mercenarë janë në luftime 6956 shtetas të huaj nga 64 vende, midis 24 shkurtit dhe 17 qershorit.
Bazura te shifrat e Moskës, rreth 1,956 prej tyre janë vrarë, ndërsa 1,779 janë larguar nga vendi.
Pala ruse pretendon se 150 mercenarë shqiptarë i janë bashkuar rezistencës ukrainase: 42 mercenarë kanë mbetur të vrarë, 40 janë larguar dhe 68 shqiptarë që vijojnë të luftojnë në Ukrainë.
Ndërkohë nga Kosova janë gjithsej 156 trupa nga të cilët 61 janë vrarë, dhe nga Maqedonia e Veriut janë vrarë 21 persona.
Sipas kësaj liste, numrin më të lartë në Evropë e ka Polonia – me 1831 qytetarë të saj që iu bashkuan radhëve ukrainase, Rumania, Kanada, SHBA dhe Mbretëria e Bashkuar, ndërsa mercenarë po ashtu ka dhe nga Franca, Kroacia dhe Estonia.
