Futbollisti 21-vjeçar i Atletico Tucuman në Argjentinë, Fabrizio Navarro, është gjendur i vdekur në banesën e tij.
Mediat argjentinase shkruajnë se Navarro ka shkuar në shtëpi pas stërvitjes, pas së cilës ka drekuar dhe ka shkuar në shtrat.
Gjatë kohës që flinte, ai ka pësuar atak në zemër, që për fatin e tij të keq i mori edhe jetën. Thuhet se futbollisti 21 vjeçar i kishte kryer kontrollet mjekësore dhe nuk kishte shfaqur asnjë shqetësim.
Navarro luajti si sulmues dhe klubi tha gjithashtu se vdekja erdhi krejtësisht papritur.
“Kjo është një humbje e madhe për ne. Fabrizio ishte vetëm 21 vjeç dhe kaloi pjesën më të madhe të jetës së tij në klubin tonë, dhe për fat të keq u gjend i vdekur në shtëpinë e tij ,” tha Mario Avila, një zëdhënës i Atletico Tucuman.
Klubi i ka dhënë lamtumirën edhe lojtarit në rrjetet sociale. “Atletico Tucuman njofton me trishtim vdekjen e Fabrizio Navarro, një i ri i lindur në vitin 2001, i cili pësoi atak në zemër. Ne i gjendemi pranë familjes në këto momente të vështira”, tha klubi.
