Kombëtarja gjermane po kalon me humor pozitiv në pushimin veror pas fitores bindëse 5:2 ndaj Italisë . Pas përfundimit të sezonit, trajneri i kombëtares Hansi Flik analizon ndeshjen në Mönchengladbach dhe tri ndeshjet e mëparshme në Ligën e Kombeve.
Cili është konkluzioni juaj pas katër ndeshjeve të Ligës së Kombeve?
Më duhet të falënderoj ekipin për kohën që kaluam së bashku. Djemtë kanë investuar shumë. Në tri barazimet, shumë gjëra nuk ishin të mira, shumë ishin shumë të mira. Ndaj Italisë ishte një test i vogël stresi. Duhet t’i bëni ekipit një kompliment të madh për mënyrën se si ata luajtën futboll. Kështu e imagjinojmë ne skuadrën në Botëror.
Çfarë ju pëlqeu veçanërisht, edhe me synimin për Kupën e Botës?
Jam i lumtur që po shkojmë në pushim në Ligën e Kombeve me gjashtë pikë. I shpërndamë mirë italianët dhe i detyruam të gabojnë, kjo tregon shumë për atë që do të bëjmë në Katar.
Si ndiheni për pushimet verore?
Fitorja ishte më se e merituar. Kjo është arsyeja pse ne mund të shkojmë në pushim më të lehtësuar. Ishte një fund i mirë për të gjithë ne. Në shtator duhet të kthejmë njërën vidë ose tjetrën, pasi nuk ishte gjithçka mirë. Por fitoret janë të rëndësishme për vetëbesimin.
Timo Verner dhe Leroi Sane u kritikuan. Si e vlerësoni performancën e tyre?
Është e rëndësishme që lojtarët të ndiejnë besim. Kështu ua kemi përcjellë lojtarëve. Jemi të lumtur për Timon që shënoi dy gola. Ashtu si Leroi, ai investoi shumë dhe e vuri kundërshtarin nën presion. Por ishte një paraqitje shumë e mirë e ekipit. Boshti funksionoi. Ne ishim shumë të sigurt për topin dhe gjithmonë gjenim një zgjidhje.
Kupa e Botës zhvillohet pa shumë përgatitje. Sa të rëndësishme janë javët dhe muajt e ardhshëm tani?
Lojtarët tani duhet të fiken, ata meritojnë pushimet e tyre. Të paktën tri javë e gjysmë pushim do të ishte mirë. Është e rëndësishme të fiket mendërisht. Ishte një sezon i vështirë dhe i gjatë si me klubet, ashtu dhe me kombëtaren
A keni ndonjë kompliment për Manuel Nojerin që nuk ia keni bërë ende?
Ai është një portier absolut i klasit botëror. Kjo vlen për mbrojtjen e portës, por edhe për topin. Ai ka qetësinë, gjakftohtësinë dhe cilësinë për të luajtur pasimet në mënyrë të tillë që kushdo që i merr të bëjë diçka me to.
Sezoni juaj i parë si trajner kombëtar ka përfunduar. Çfarë ju bëri të lumtur, çfarë ju mërziti?
Jam i lumtur që jemi ende të pamposhtur. Katër barazimet me radhë më mërzitën.
