Haki Çako ka folur për situatën aktuale të zjarreve në ishullin e Sazanit, ku ende vijon të ketë vatra të pashuara.
Në një lidhje direkte për emisionin “Të Paekspozuarit” në MCN TV, Çako dha disa sqarime lidhur me operacionin që po zhvillohet dhe arsyet përse ende nuk janë përdorur helikopterë. Por, ai shtoi se mjetet ajrore mund të përdoren që ditën e nesërme.
Pjesë nga biseda:
Haki Çako: Përveç pjesëmarrjes së forcave të armatosura, kemi dërguar edhe ekspertë xhenierë që njohin hartën e zonës. Nuk ka ndonjë problem dhe nuk rrezikohen forcat. Nuk ka zona që mund të eksplodojnë.
Ylli Rakipi: Përse nuk përdoren helikopterë? Ka pasur shumë pyetje. A ka Shqipëria helikopterë?
Haki Çako: Helikopterë ka, kanë kohën e remontit sa kanë edhe orët e fluturimit në ajër. Sapo kemi filluar sezonin e verës. Një nga mjetet kryesore është në një remont të pjesshëm. Për pak ditë vihet në dispozicion. Kemi helikopterë të tjerë, por nuk janë me operim me kova për fikjen e zjarrit. Po e ndjekim situatën hap pas hapi. Determinant në fikjen e zjarrit kanë qenë forcat nga toka. Në darkë, pas vlerësimit total të situatës, pritet të ndërhyjmë edhe nga ajëri.
Ylli Rakipi: Kemi një bilanc se çfarë është djegur?
Haki Çako: Është herët të bëhet një bilanc që tani. Mund ta flasim për siparfaqjen në hektarë por jo të bimësisë. Bimësia, në zonën e Sazanit është e përbërë kryesisht nga shkurret, por ka edhe pishë, që janë përshkuar nga ky zjarr. Zjarri ka marrë përmasa në pjesën e poshtme kryesisht.
Ylli Rakipi: Mendoni se kemi të bëjmë me zjarrëvënie të qëllimshme?
Haki Çako: Me shumë gjasa zjarri është me dashje, pavarësisht nga qëllimi që mund të përkojë ose jo me dëshirën. Është produkt i njeriut. I takon organeve të hetimit, për të identifikuar dhe për të vënë përpara përgjegjësisë autorët.
Ylli Rakipi: Kemi dhe një zjarr tjetër në rrugën e kombit?
Haki Çako: Po, ka qenë zjarr i lokalizuar. Deri vonë ka qenë nën kontroll, por një vatër tjetër është shtuar dhe do të shtohen forcat. Do të punohet intensivisht gjatë ditës së nesërme.
Ylli Rakipi: Pritet një verë e nxehtë. Jeni përgatitur për këtë?
Haki Çako: Ne kemi marrë masat, kuptohet që përballimi i fenomeneve të tilla, do të duhet të angazhojë të gjtihë komunitetin. Nuk është fenomen që përballohet me strukura, me individë dhe me persona.
