Kantautori Eugent Bushpepa ka rrëfyer në “A live Night” të pathënat nga konkurimi i tij në Eurovizion në vitin 2018 me këngën “Mall”.
Bushpepa tha se për të ishte periudhë stresuese, pasi i është dashur të merrej jo vetëm me këngën, por ka bërë edhe rolin e skenografit, dhe jo vetëm.
“Eurovizioni ka qenë një periudhë goxha stresuese për mua të them të drejtën. Për mua si Gent, se për pjesëtarët e tjerë ka qenë një periudhë shumë e bukur. Isha gjatë gjithë kohës me intervista, mbështetësja ishte me pikatore, goxha e vogël. Më është dashur të bëj skenografin, vendosjen e pjestarëve të grupit vetë në skenë, ku do vendoset kitarist, kur do ndizen dritat blu, dritat e kuqe, a thua se nuk kishte skenograv, as desginer RTSH. Më është dashur të merrem nga A deri te Zh me të gjitha gjërat duke qenë se edhe kënga ishte e imja. Mendoj se ishte pikë kulmore e artit tim, është një ndër pikat që unë jam krenar”, tha Bushpepa.
Bushpepa me këngën “Mall” u rendit në vendin e 11-të në finale e 4 viteve më parë me 184 pikë, duke i dhënë Shqipërisë rezultatin e tretë më të mirë në këtë garë që nga debutimi i saj.