“Presidenti i Republikës, Sh.T.Z Ilir Meta është në ndjekje të procedurës për zgjedhjen e zotit Bajram Begaj si President i ri i Republikës dhe do të respektojë çdo vendim të Kuvendit të shprehur me votës”. Ky është njoftimi i Presidencës lidhur me çështjen e zgjedhjes së kreut të ri të shtetit që është kthyer në lajtmotiv orët e fundit.
“Lidhur me këtë çështje dhe specifikat e saj Presidenti Meta ka zhvilluar sot një bisedë telefonike me Ministrin e Mbrojtjes, z.Niko Peleshi”, thuhet më tej në njoftim.
Ditën e djeshme, Edi Rama deklaroi se Bajram Begaj, Shefi i Shtabit të Përgjithshëm të Ushtrisë, ishte zgjedhur nga socialistët si kandidatura për kreun e ri të shtetit. Këtë të Shtunë, socialistët kanë vijuar procedurat me depozitimin e kandidaturës në Kuvend, ndërsa në orën 18:00 është caktuar votimi.
Ish-kryeministri Sali Berisha e quajti anti-kushtetuese propozimin e Ramës për kreun e ri të shtetit, duke qenë se ai ende mban detyrën si ushtarak.
Për këtë, Begaj i ka kërkuar lirimin nga detyra si ushtarak ilir Metës, i cili është dhe kreu i Forcave të Armatosura. Por, Berisha i bën apel Metës ta ndalojë zgjedhjen e tij në krye të shtetit.
Një ngërç të mundshëm e parashikuan dhe socialistët në mbledhjen e sotme të grupit, ku Taulant Balla tha se “kemi menduar mënyrën e zgjidhjes nëse larg qoftë na krijohet ndonjë ngërç me presidentin e republikës”. Por, pa dhënë detaje rreth procedurës në fjalë.
Meta nga ana tjetër, nisur nga reagimi i tij, duket se do ti japë dritën jeshile çdo votimi në Kuvend, pa u bërë pengesë.
