Partia Popullore Europiane ka ngrirë votën e PD-së, ndërsa kjo e fundit pavarësisht se ka zgjedhur kreun e ri të saj, ish-Kryeministrin Sali Berisha, Këshillin Kombëtar dhe Kryesinë e re, pret një vendim nga Gjykata e Apelit për t´i dhënë një zgjidhje juridike situatës së përplasjes.
Referuar një dokumenti mbi kongresin e PPE që zhvillon punimet në Roterdam të Holandës, PD nuk përfaqësohet nga asnjë përfaqësues me të drejtë vote, edhe pse pak ditë më parë u njoftua se 3 deputetë ë kësaj partie, do të ishin pjesëmarrës në këtë event.
Ndoshta përplasjet brenda PDSH ka detyruar PPE që për të shmangur një situatë të pakëndshme lidhur me përfaqësimin, ka vendosur që kjo parti të mos ketë të drejtë vote.
PD është në pritje të vendimit nga Gjykata e Apelit, atje ku vendimi i 25 marsit i dhënë nga gjyqtari Agron Zhukri që njohu Kuvendin e 11 dhjetorit, rrjedhimisht edhe Komisionin e Rithemelimit, është ankimuar nga Enkelejd Alibeaj, i cili pretendon që është kryetar i komanduar i PD me firmën e Gazment Bardhit.
