Deputeti demokrat Dashnor Sula e konsideron vendimin e pritshëm të Gjykatës së Apelit si vendimtarin për fatet e Partisë Demokratike.
Ndërkohë që anëtarësia e PD, përmes parimit “1 anëtar, 1 votë” ka zgjedhur me 22 maj Sali Berishën si kryetarin e kësaj partie, ndërsa Këshilli Kombëtar miratoi dje 20 anëtarët e rinj të Kryesisë, Sula thekson se i gjithë procesi do të varet nga vendimi që do të japë Gjykata e Apelit.
“Ka edhe një shans të fundit që është vendimi i Gjykatës së Apelit. Nëse gjykata i jep të drejtë z.Alibeaj, duhet të ketë një deklaratë nga instancat më të larta që të lënë çdo proces dhe të nisë procesi i zgjedhjeve dhe zgjedhjes së kryetarëve të rinj dhe kryesive të reja. Nëse ndodh e kundërta që Apeli t’i japë të drejtë Komisioni i Rithemelimit, pala tjetër z.Alibeaj dhe të gjithë ne duhet t’i vëmë gishtin kokës që t’i bashkëngjiteni Rithemelimit për të bërë të mundur bashkimin e PD”, thotë Sula.
