Doktor David Heymann, i cili më parë ka drejtuar departamentin e urgjencave të OBSH-së, thotë se teoria kryesore për të shpjeguar përhapjen e lisë së majmunëve është transmetimi seksual midis burrave homoseksualë dhe biseksualë në dy festa masive të mbajtura në Spanjë dhe Belgjikë.
Ne e dimë se lija e majmunit mund të përhapet kur ka kontakt të ngushtë me puçrrat e dikujt që është i infektuar dhe duket sikur kontakti seksual tani e ka përforcuar atë transmetim.
Kjo teori është larg nga modeli tipik i përhapjes së sëmundjes në Afrikën qendrore dhe perëndimore, ku njerëzit janë të infektuar kryesisht nga kafshë si brejtësit e egër dhe primatët dhe shpërthimet nuk i kalojnë kufijtë. Deri më sot, OBSH ka regjistruar më shumë se 90 raste të lisë së majmunëve në dhjetëra vende përfshirë Britaninë, Spanjën, Izraelin, Francën, Zvicrën, SHBA-në dhe Australinë.
Enrique Ruiz Escudero, një zyrtar në Madrid thotë se autoritetet po hetojnë lidhjet e mundshme midis një feste të fundit të Gay Pride në Ishujt Kanarie, e cila mblodhi rreth 80,000 njerëz, dhe rasteve në një sauna në Madrid. Lija e majmunit zakonisht shkakton ethe, të dridhura, skuqje dhe puçrra në fytyrë ose në organet gjenitale. Mund të përhapet përmes kontaktit të ngushtë me një person të infektuar ose veshjeve ose çarçafëve të tij, por transmetimi seksual ende nuk është dokumentuar.
Shumica e njerëzve shërohen nga sëmundja brenda disa javësh pa kërkuar shtrimin në spital. Vaksinat kundër lisë janë gjithashtu efektive në parandalimin e lisë së majmunëve dhe disa ilaçe antivirale janë duke u zhvilluar.
