Deputeti Ervin Salianji, i ftuar në “Radari Informativ” në Abc, shprehet se Enkelejd Alibeaj nuk ka asnjë tagër në negociatat me PS për zgjedhjen e Presidentit të ri, aq më shumë për të propozuar emra kandidatësh në emër të opozitës.
Sipas tij, demokratët duhet të ulen fillimisht me njëri-tjetrin.
“Opozita ka minimalisht 63 deputetë që kanë dalë nga votat më 25 prill. Nga këto ka një pakicë me 22, po marrim rastin, që nuk e plotëson kuorumin për të marrë një vendimmarrje. Nuk e kuptoj si mund të quhet një marrëveshje kur brenda PD është një numër që nuk plotëson kuorumin për zhvillimin e mbledhjes dhe shkon pa asnjë tagër. I ka bërë të gjitha veprimet e nxituara, nuk ka thirrur grupin parlamentar. Sido që ta merrni 52 deputetë ka grupi parlamentar. Çfarë fiton PD nga kjo, çfarë fiton opozita? Pse është ky nxitim për tu ulur me 3 njerëz të PS që PD i ka akuzuar ndër vite dhe nuk ulemi me demokratët?”, tha Salianji
Deputeti demokrat u shpreh se PD e ka të drejtën të propozojë në të pesta raundet.
“Kam kërkuar që ditën e parë që të bëhet një mbledhje e përbashkët, por kemi një nxitim të pashpjegueshëm. PD e ka të drejtën të propozojë në të gjitha raundet. Ky kompleksi që ata që kemi kundërshtarë duhet të na konfirmojnë që jemi opozitë është e tmerrshme. Kjo është të shkatërrosh personalitetin e cilitdo që merr pjesë aty”, shtoi ai.
Salianji e shikon si një lojë politike të kryeministrit Rama të gjithë procesin për zgjedhjen e kreut të ri të shtetit. Në gjykimin e tij, procesi duhet të shfrytëzohet nga vetë demokratët për një bashkim. Presidenti është zgjedhur tashmë nga Rama sipas deputetit demokrat.
“Rama me përfaqësuesit e vet është në lojën e vet politike dhe ka hedhur një grep. Ka kapur ai, këtu, ka peshkuar dhe ka kapur një pakicë që po lufton për interesat e veta. PD e ka të drejtën të propozojë në çdo raund. Rama të gjithë fokusin nga emrat e vet që do t’i zgjedhë do thotë se “shiko propozuan ata 3-4 po këta s’janë dakord vetë, a s’janë më të mirë këta.” Kjo është një lojë. Ky proces duhet të shfrytëzohet për tu ulur gjithë deputetët opozitarë. Sot është urgjente që të bashkohen deputetët vetë jo t’i zgjedhin presidentin Ramës.
Presidentin e ka të zgjedhur ai. Gjithçka që thuhet në këtë sulm politik vetëm i jep peshë atij që sulmohet. Për ne është më mirë të ulemi me Ballën që e kemi akuzuar apo me Luçiano Boçin që është deputet i kësaj PD-je? Çfarë sensi ka kjo? Kjo është një lojë politike e Ramës, por PD nuk duhet të bjerë në grackë. Nuk e kuptoj çfarë është ky nxitim për tu ulur me këta”, shtoi Salianji.
