Banorët e Lumasit kërkojnë ndarjen nga Bashkia e Kuçovës për shkak të bashkëpunimit të kryebashkiakut me kompaninë Salillari për ndërtimin e Ujësjellësit të Sinecit, të cilin e kundërshtojnë. Për projektin, të cilin e cilësojnë abuziv e korruptiv, ata kanë kallëzuar Kryebashkiakuan dhe firmën private.
Banorët e Lumasit i janë rikthyer protestave kundër projektit të bashkisë Kuçovë që po zbatohet nga kompania Salillari për ndërtimin e një Ujësjellësi me ujin e burimit të Sinecit.
“Ujin po e marrin për të përfituar disa persona që te Blendi Klosi, Ermonela Felaj.”
“Ne të varfër jemi vërtet, fshatarë jemi vërtet, por budallenj nuk jemi, ta dijë Edi Rama.”
Me kryebashkiakun, Kreshnik Hajdari, dhe firmën private që i akuzojnë për abuzime e korrupsion janë në procese gjyqësore, por shprehen se cilido të jetë vendimi, burimin do ta mbrojnë me jetë. “Ne jemi në proces gjyqësor, por edhe po mos ta fitojmë ne do të vazhdojmë më tej.”
“Na ka mbetur vetëm, të shkojmë në burg, të derdhim gjak. Nuk ke ku e gjen të drejtën më, do të vazhdojmë derisa të vdesim, se ai ashtu e do të vdekur popullin.”
Bashkinë e Kuçovës e akuzojnë për shkatërrimin total të zonës së Lumasit, e cila është me rrugë të shkatërruara, pa ura dhe ku njerëzit vuajnē për bukën e gojës. Ndaj kërkojnë ndarjen nga kjo njësi administrative.”Kërkojmë ndarjen menjëherë nga Kuçova.”
“Po të jetë për komunën e Lumasit këtu dhe bashkinë e Kuçovës, nuk duan t’ja dinë fare për këtë popull.” Beteja për ujin e Sinecit vijon prej gati dy vitesh me protesta dhe rrugë gjyqësore.
