Gazetarja e kulturës, Elsa Demo, e larguar nga puna në televizionin Abc News pak ditë më parë, ka rrëfyer më shumë detaje për këtë moment të karrierës së saj në një intervistë për Adi Krastën.
Gjatë intervistës ajo ka thënë se zyrtarisht largimi nga puna i është komunikuar për shkak të ristrukturimit të vendeve të punës në televizion, si dhe i është lënë të kuptojë se emisioni s’ka audiencë. Por vetë Demo ka zbuluar gjatë intervistës arsye të tjera që lidhen direkt me marrëdhënien mes medias dhe politikës, marrëdhënie që ajo thotë se është bërë si mishi me kockën.
“Nëse hapim kapitullin e shikueshmërisë në media, atëherë le ta hapin këtë kapitull deri në fund. A mos është kthyer media në një pushtet ekonomik fitimprurës? Unë atë renditjen e pushtetit të katërt nuk e kam marrë seriozisht më përpara, por tani mendoj që media po kthehet në një institucion të pushtetshëm ekonomik, i cili po bën shitje dhe blerje me një pushtet, që ne e mendonim të parin, që është pushteti politik. Kemi hyrë në një fazë të tillë që e kanë provuar vendet e lindjes, se si media dhe politika janë bërë mish e kockë dhe kanë krijuar oligarkët e tij”, u shpreh Demo. Më poshtë shihni videon e plotë të intervistës së saj.
