Ministrja e Kulturës, Mirela Kumbaro dhe kryebashkiaku i Durrësit, Vangjush Dako, informuan sot Komisionin parlamentar të Edukimit të drejtuar nga demokrati Genc Pollo, pas pezullimit të punimeve në sheshin “Veliera” të Durrësit për shkak të gjetjeve të reja arkeologjike.
Në këtë mbledhje ishin thirrur edhe: Unioni i Ekspertëve Mjedisorë të Shqipërisë, përfaqësues të Institutit të Arkeologjisë dhe Aleanca e Mbrojtjes së Vlerave Kombëtare.
Në fjalën e saj zonja Kumbaro tha se është respektuar ana proceduriale.
Kryebashkiaku Dako tha se nuk e meritonin të etiketoheshin barbarë.
“Ne e konstatojmë me fakt se në ato gërmime kanë dalë objekte me vlerë. I kemi ftuar të gjithë të shikojnë kantierin që ndryshe nga të gjithë kantierët e tjerë, që janë rrethuar me llamarinë, ne e kemi lënë të hapur pa llamarinë për transparencë, me qëllim që njerëzit ta shikojnë se s’kemi gjë për të fshehur. Por ashtu kemi vendosur kamera dhe mund t’ua vëmë në dispozicion të të gjitha institucioneve.
Jemi shumë të prekur nga njerëz që me hamendje na etiketojnë si barbarë ndërkohë që është krejt ndryshe, sepse ne po i ndjekim punimet hap pas hapi.
Që nga zbulimi i parë kur ne gërmuam nën 40 cm, dolën themelet e një objekti. Kemi predispozicionin që gërmimet të kryhen deri në fund. Nga foto qe kemi këtu, objekti daton nga fundi i viteve 1800; është i prishur dhe ndodhet në të njëjtën lijë ndërtimi me bankën e ndërtuar në vitin 1920. Pra, është e të njëjtit vit me bankën.
Për sa i përket murit rrethues, ne nuk e kemi prekur dhe jemi larguar 15 m e nuk kemi kryer asnjë gërmim. Vetëm në zonën B kemi kryer gërmime në prezencë të arkeologëve dhe jemi të hapur që çdokush ta verifikojë.
Nëse dikush thotë se ne duhet ta ndërpresim, jemi gati të bisedojmë me hartuesin e projektit dhe ta konservojmë zonën. Jemi të hapur si bashki dhe e konsiderojmë si vlerë çdo lloj gërmimi në Durrës”, tha ai.