Një oficer policie nga Swansea është dënuar me 3 vite e 6 muaj burg pasi shpërdoroi detyrën e tij në përpjekje për të akuzuar ish të dashurën për vrasjen e një shqiptari dhe shpërndarje droge.
Abubakar Masum, 24 vjeç, akuzoi pa fakte, Mia Pitman, 23 vjeç, për një sërë krimesh, bazuar në informacione anonime, pasi ajo e ndau atë.
Studentja Pitman u arrestua nga policia, ndërsa ishte në punën e saj me kohë të pjesshme. Oficerët bastisën banesën e saj.
Gjykata e Cardiff Crown dëgjoi se Masum ishte ‘i fiksuar’ pas zonjës Pitman, e cila i dha fund lidhjes së tyre pasi mësoi se ai kishte ngacmuar një grua tjetër.
Pasi u nda me të, Masum ngriti pretendime ‘të rreme, të pavërteta dhe dashakeqe’ kundër saj.
Pitman, një studente e kriminalistikës që donte të hynte në forcat e policisë, u akuzua se kishte qëlluar për vdekje një gangster shqiptar, duke fshehur një armë në kopshtin e saj.
Por pas hetimeve, policia zbuloi se gjithçka ishte një trillim i policit të fiksuar pas saj.
