Dy rivalët, Edi Rama dhe Lulzim Basha kanë shkëmbyer akuza e replika në distancë. I pari ishte kreu i PD-së, i cili në një takim me gazetarët e quajti Ramën “Al Kapone” në karrigen e kryeministrit që nuk e do sipas tij reformën në drejtësi. Por i menjëhershëm ka qenë reagimi i kryeministrit i cili është përgjigjur në facebook me lojëra fjalësh.
“Vaj Medet PD që kërcen si “prifti nga belaja” e di mirë ky popull sa e do reformën në drejtësi po e di edhe ti që do, s’do, do bësh sikur do!…Dhe jo vetëm do bësh sikur do, po do bësh edhe sikur po na bind edhe neve! Bëj ç’të duash e thuaj ç’të duash po nxito se duhet të votojmë!”, shkruan Rama.
E ndërsa statusi i Ramës i është lexuar Bashës në takimin me gazetarët ai ka thënë se kryeministrit i ka hipur vetja në qejf dhe flet me paragrafet e Duçes.
“I ka hyrë vetja në qejf kaq shumë, sa ka filluar të flasë me paragrafët e Duçes. Byroja e Hetimit do të veprojë ashtu siç është parashikuar të funksionojë. Kështu që edhe në Shqipërinë nuk do tolerohen ata që abuzojnë. Reforma do bëhet, nuk do ta bllokojë dot qeveria e Ramës reformën. Po nuk e bëri qeveria e tij, do ta bëjë qeveria ime”, deklaroi Basha.
