Ish-kryeministri Sali Berisha akuzoi sërish këtë të Premte ambasadoren amerikane në Tiranë se po ndërhyn në punët e brendshme të Partisë Demokratike.
Në një konferencë për mediat këtë të Premte, Berisha u pyet lidhur me deklaratat e Yuri Kim gjatë një interviste televizive një ditë më parë. Ambasadorja tha se nga rreth 200 persona të shpallur “non grata”, asnjë vendim s’është zmbrapsur deri më tani. Më herët, mbështetës së Berishës kanë deklaruar se vendimi i DASH ndaj Berishës mund të zhbëhet me ikjen e administratës Biden.
Interesit të gazetarëve për deklaratën e djeshme të Kim, Berisha iu përgjigj: “Fushatë elektorale kundër Berishës në prag të garës së tij për kreun e PD. Unë i bëj thirrje qeverisë së SHBA dhe presidentit Baiden të mos lejojë përfaqësuesen e tyre të ndërhyjë në punët e brendshme të partive politike, veçanërisht përpjekjet e paimagjinueshme për të caktuar kryetarin e opozitës shqiptare, të partisë konservatore shqiptare”.
