Ish-kryeministri Sali Berisha sfidoi kreun e qeverisë Edi Rama që të votojnë një ligj që ndalon parashkrimin nga veprat penale për kryeministrat e vendit.
“Në je burrë dhe ta mban hajde të kalojmë ligjin në parlament, të përjashtojmë kryeministrin nga çdo parashkrim, të vetmit që përjashtohen nga parashkrimi janë kryeministrat”, tha Sali Berisha këtë të Premte në një konferencë për mediat.
Por për ish-kryeministrin, Rama nuk mund ta votojë këtë ndryshim pasi “ka frikë nga tmerr nga firmat e tij që se di ca ka firmos për të mbushur valixhet”.
Berisha lëshoi akuza të tjera ndaj kreut të qeverisë gjatë qeverisjes së sotme. Berisha tha Rama është argat i Vuçiçit, duke kujtuar votën e djeshme të deputetëve të mazhorancës kundër rezolutës që dënonte gjenocidin serb në Srebenicë. Po ashtu, kujtoi se Rama refuzoi propozimin e Presidentit të Ukrainës për të ndaluar rusët të hyjnë në Shqipëri për sezonin veror. Ish-kryeministri kujtoi kanabizimin e vendit, moshapjen e negociatave, largimet masive, rënien e lirisë së medias dhe të tjera çështje problematike për vendin. Për të, fajtori është kreu i qeverisë Edi Rama.
Berisha u ndal edhe te takimi i Ramës me të shpallurin “non grata” nga SHBA Milorad Dodik, dje në Bruksel. “(Rama) Ka shpifur në Departamentin e Shtetit, ka mashtruar për dinezinjim tim “non grata” kur puthet pllaq e plluq me Dodikun në Bosnje dhe tani i kërkon gjyqtarëve e prokurorëve të faktojnë shpifjet që ka bërë ndaj meje me raportet e tij false”, tha Berisha.
Po ashtu, ai u shpreh se bordet e posaçme të krijuara me nismë të qeverisë për përcaktimin e çmimeve të karburanteve dhe disa produkteve të tjera ushqimore bazë po vjedhin shqiptarët. Berisha u bëri thirrje biznesmenëve që janë pjesë e bordeve, të dalin prej tyre.
