Prokuroria e Krimeve të Rënda ka thirrur dy herë brenda ditës së djeshme motrën e Enver Stafukës.
Pas intervistës së dhënë në gazetën “Panorama”, Fitnete Stafuka është thërritur që në mëngjes e më pas edhe në mesditë për të dhënë shpjegime në lidhje me pretendimet dhe emrat e cituar prej saj si të implikuar në rrëmbimin e të vëllait dy vite më parë, në qendër të qytetit të Fushë-Krujës
Burime nga Prokuroria bënë të ditur se motra e Stafukës është thirrur për t’u marrë në pyetje në lidhje me pretendimet që ajo dhe familja e saj kanë rreth autorëve të ngjarjes, me qëllim për t’u shkuar hetimeve deri në fund.
Mësohet se Fitnete Stafuka është pyetur me hollësi rreth ballafaqimit që ka pasur me Durim Bamin në lidhje me zhdukjen e vëllait të saj. Gjithashtu, hetimorët e kanë pyetur me detaje edhe në lidhje me pohimin e Bamit tek ajo për një atentat të kryer ndaj Shullazit.
Gjithashtu, Fitnete Stafuka është pyetur rreth pretendimeve që ka në lidhje me autorët e mundshëm të rrëmbimit të të vëllait, çfarë dinte në lidhje me aktivitetet e tij dhe nëse ai i kishte ngritur ndonjë shqetësim apo i ka treguar asaj krimet e grupit të Durim Bamit. Thirrjen në Prokurori e pohoi dje edhe vetë Fitnete Stafuka.
Sipas saj, pas publikimit të intervistës së saj, Prokuroria e Krimeve të Rënda është vënë në lëvizje dhe prokurorët kanë kërkuar takim në orët e para të paradites me Fitnete Stafukën dhe sërish rreth mesditës është kërkuar një ritakim me të.
Gjatë takimit, asaj i është garantuar se strukturat e këtij institucioni do të verifikojnë të gjitha dyshimet që ka familja rreth identitetit të autorëve, por edhe zbardhjen dhe vënien para drejtësisë së autorëve ende të paidentifikuar, dy vite pas rrëmbimit në qendër të Fushë-Krujës.
Gjatë intervistës, Fitnete Stafuka u shpreh se familja e saj ka dyshime të forta se përgjegjës për rrëmbimin dhe zhdukjen e Enverit janë Durim Bami dhe Elvis Alla.
Fitnete dhe Enver Stafuka – Durim Bami
“Unë personalisht u kam kërkuar llogari personave, të cilët ishin shokët e tim vëllai, për zhdukjen e tij. Katër-pesë shokë, me në krye Durim Bamin, janë përgjegjës për rrëmbimin dhe zhdukjen e tim vëllai. Elvis Alla ishte personi që e telefonoi të dilte nga shtëpia, duke i kërkuar të pinin një kafe në qendër të qytetit, pasi Enveri e kishte shtëpinë jashtë qytetit. Pasi ka mbërritur në afërsi të qendrës, në vendin ku ndodhi rrëmbimi, Durimi dhe tre persona të tjerë e futën me forcë në makinë. Enverin e prenë në besë shokët e tij, me qëllim që të mos u dilnin krimet që kishin bërë si grup kriminal. Unë isha personi më i afërt i Enverit e i dija të gjitha lidhjet e tij dhe jetën që ai bënte, si dhe me kë rrinte. Me Durimin dhe Elvis Allën jam përballur e u kam kërkuar të më tregonin të vërtetën. U kërkova të më tregonin pse e rrëmbyen vëllain tim dhe çfarë bënë me të. Unë jam e sigurt për këto që po them. Unë ua kam thënë përballë Durim Bamit dhe Elvis Allës se janë në gjak me ne”, u shpreh ndër të tjera Fitnete Stafuka.
Ajo pohoi edhe faktin se e kishte takuar Durim Bamin, por ky i fundit i kishte thënë asaj se Enverin e ka rrëmbyer Shullazi, pasi ai (Bami) i kishte bërë një atentat./Panorama/
