Vijojnë debatet dhe akuzat në Kuvend mes deputetëve të opozitës dhe ministrave të Qeverisë Rama. Detyrën e replikuesit gjatë seancës së sotme Kryeministri Edi Rama ia kishte ngarkuar Ulsi Manjës, ministrit të Drejtësisë, me të cilin u shfaqe edhe dje në një konferencë për mediat në selinë e PS.
E ndërsa Salianji sot denoncoi mbi një tender, që sipas tij, Ministria e Brendshme ia kishte dhënë ofertuesit me ofertën më të ulët, KPP ndryshoi fituesin duke shpallur atë që ofronte 300 mijë euro më shumë. Salianji tha se këtu diskutohet vetëm si të vidhet, ndërsa janë kthyer akuzat e viteve ’90 a thua se nuk keni 30 vite në këtë sallë.
“Sot është një retorikë që na nxjerr të gjithëve njësoj në sytë e qytetarëve. E ka bërë politikën më interesante tek portokallia tek zona e Brrylit sesa tek kjo portokallia këtu që nuk bën as për të qeshur. Çdo autoritar vendos vetëm njerëzit e vetë për të pasur pushtet absolut.
Edhe ne kemi rënë në këtë grackë duke mos u marrë me probleme reale. Para se të dilja këtu më sollën një denoncim ku Ministria e Brendshme, i kishte dhënë tender një kompanie që kishte ofertën më të ulët, por KPP ndryshoi fituesin duke shpallur atë me 300 mijë euro më shumë”, tha Salianji.
Në replikë me deputetin e PD ka reaguar Ulsi Manja, i cili tha “e bukura në këtë sallë është se të gjitha diskutimet e opozitës bëhen se cfarë ka dashur të thotë Edi Rama gjatë prononcimeve publike. Rama atë që thotë nuk le hapësirë për mëdyshje, se i thotë më zë të lartë. Patronazhistët janë një instrument politik vullnetar dhe i kanë marrë të dhënat në biseda telefonike dhe kontakte të drejta me njerëzit. Ju nuk doni ta kuptoni se ju hala nuk shihnu njëri tjerin në sy e pastaj kërkoni hesap për njeri tjetrin. Ne punojmë 365 ditë të vitit. Ju i perdorni zgjedhësit si leva, sopata. Pastaj thoni vendet e punës, patronazhistët, e gozhduat Lulin si shkak të humbjes. A do e ndani mendjen se kush ishte shkaku, se erdhi 2023. Votoni konventen, të mbrojmë të dhënat personale. Të votojnë të lirë. Mesa shoh unë këtu ju se keni mendje te zgjedhjet por ju se duroni njëri tjetrin”.
