Zgjedhja e Presidentit është një nga temat kryesore të ditëve të fundit.
Këtij procesi i janë bashkuar edhe Dhoma e Tregtisë dhe Industrisë duke propozuar kështu emrin që sipas tyre është i përshtatshëm për një status të tillë.
Dhoma e Tregtisë dhe Industrisë Tiranë , në një shkresë zyrtare drejtuar Kuvendit të Shqipërisë ka propozuar si kandidat për President Përparim Kalon, me një përvojë të gjatë në fushën e gjyqësorit dhe të diplomacisë.
Dhoma e Tregtisë dhe Industrisë Tiranë shprehet se është në mbështetje të propozimit të organizatave të shoqërisë civile dhe dhomës së sipërmarrësve Italianë në Shqipëri për kandidaturën e Z.Përparim Kalo për President të Republikës së Shqipërisë.
Kërkesa zyrtare e Dhomës së Tregtisë Tiranë
Te nderuar koleg,
Dhoma e Tregtisë dhe Industrisë Tiranë në vendimin e fundit të kryesisë së këtij institucioni të datës 11 maj 2022, është në mbështetje të propozimit të organizatave të shoqërisë civile dhe dhomës së sipërmarrësve Italianë në Shqipëri për kandidaturën e Z.Përparim Kalo për President të Republikës së Shqipërisë.
Kryesia e Dhomës së Tregtisë dhe Industrisë Tiranë, në mbledhjen e saj të datës 11 Maj 2022, vendosi:
“Të vlerësojë ftesën e hapur që politika dhe institucionet e rëndësishme të shtetit i kanë bërë shoqërisë civile dhe organizatave të biznesit në lidhje me zgjedhjen e Presidentit të Republikës.
Të vlerësojë pozitivisht dhe mbështesë propozimin e 10 organizatave të njohura të shoqërisë civile dhe dhomës së sipërmarrësve Italianë në Shqipëri, për kandidaturën e Z. Përparim KALO për postin e lartë të Kryetarit të Shtetit. Dhoma e Tregtisë dhe Industrisë- Tiranë është dëshmitare e reputacionit dhe përvojës së tij të gjatë dhe kontributit të veçantë si jurist dhe veprimtar aktiv në mbështetje të organizatave të biznesit, si në kuadrin e përmirësimit të legjislacionit shqiptar, sidomos atij tregtar dhe në përmirësimin e klimës së biznesit e të investimeve, nëpërmjet lobimit dhe rekomandimeve të vazhdueshme si anëtar i disa bordeve të organizatave të biznesit.
Jemi të bindur se me figurën e tij publike, të pandikuar politikisht ai mund të realizojë atë që kërkohet më shumë se kurrë sot, qëndrimin mbi palët, në mbrojtje të rendit kushtetues, që justifikon plotësisht ushtrimin e funksioneve të rëndësishme që ka Presidenti i Republikës.
Vlerësimi i kësaj kandidature do ti jepte shpresë jo vetëm biznesit por edhe më gjerë organizatave të shoqërisë civile, se tashmë zhvillimi i ekonomisë mbi baza sa më të qarta dhe të shëndosha kushtetuese e ligjore fillon me vendosjen në krye të shtetit të një personi që ka të gjitha parametrat e duhura për të luajtur në mënyrën më të mirë rolin e Presidentit”.
