Kuvendi i Shqipërisë nuk miratoi një rezolutë të propozuar nga demokratët për të dënuar gjenocidin serb në Bosnje.
Kerkesa e bërë nga deputeti i PD-së Tritan Shehu nuk u votua nga mazhoranca.
Para votimit, ish-kryeministri Sali Berisha tha se “Vuçiç është frymëzuesi i gjenocidit serb”, ndërsa shtoi se “ky njeri është Putin i vogël që t’i përsërisë ato në çdo kohë”.
“Ne kemi detyrim po kaq madhor për të dënuar këtë gjenocid, i cili është sanksionuar në dy vendime të gjykatave të mëdha të kohës, Gjykata e Hagës dhe gjykatës ndërkombëtare të krimeve të luftës në ish-Jugosllavi. Në rrafshin juridik ky është gjenocid universalit, i faktuar dhe pranuar nga mbarë vendet e qytetëruara”, u shpreh Berisha.
Pas tij fjalën e mori Taulnt Balla, i cili tha se një rezolutë për dënimin e gjenocidit serb ishte miratuar më herët nga parlamenti.
Po ashtu, akuza hodhi ndaj ish-kryeministrit Sali Berisha.
“Gjenocidi serb në Srebrenicë nga ushtria jugosllave është ushqyer me naftën prej teje Sali. Në 25 prill të vitit 1995, rreth 3 muaj nga dita e ndodhjes së kësaj tregjedie, gazeta New York Times publikon një raport të zv.presidentit amerikan Algor. Në raport thuhet, Shqipëria po furnizon me naftë kontrabandë, ushtrinë serbe në Bosnje. Në bazë të këtij raporti, SHBA-të arrijnë në përfundimin që Shqipëria po thyen embargon. Ne mund të bëjmë një rezulotë për këtë çështje, por kurrë një rezolutë që të vijë me firmën tënde të botës së përtejme”, tha Balla.
“Përsa i përket marrëveshjeve të tua për të furnizuar makineritë e luftës, do i ftoja të gjithë kolegët, merrni dhe lexoni librin e ish-presidentit të Malit të Zi, Momir Bulatoviç, i cili I ka shkruar në një libër. Thotë se kemi pasur një marrëveshje me presidentin e asaj kohe Sali Berishën, për të shtrirë tubat në liqenin e Shkodrës për të çuar naftën në Mal të Zi. Ti ke thyer embargo e Shteteve të Bashkuara me marrëveshje”, shtoi ai.
Pas deklaratave nga foltorja e Kuvendit, rezoluta nuk u miratua pasi deputetët e mazhorancës ngritën kartonin e kuq.
Pas vendimit, Berisha tha se deputetët e mazhorancës votuan sipas urdhrit të Aleksandër Vuçiç.
“Ju shkelmuat mbi gjakun, jetën e 8 mijë burrave të pafajshëm të Bosnjës. Votuat duke shkelmuar jetën e dhjetëra në mos qindra mijëra shqiptarëve që ranë për t’u bërë të pavdekshëm nga gjenocidi serb. Por ç’mund të presësh nga një trafikant, nga një kryetar organizate kriminale, skllav i Aleksandër Vuçiçit? Ai çdo gjak mund të ketë në dejet e tij, përveç gjakut shqiptar. Si mund të silleni si kope? Si mund të bëni ju si shqiptarë një votim të tillë”, tha Berisha.
