“Për tre minutat magjike të këngës së kënduar nga Ermal Meta jetuam në një botë pa kufij e pasaportë”
Ashtu si mijëra vetë të komunitetit të madh të shqiptarëve në Itali, edhe Kledi Kadiu është i lumtur për pjesëmarrjen e Ermal Metës në Sanremo dhe suksesin e korrur prej tij me çmimin Cover për ri-interpretimin e “Amara terra mia” të Modugno-s.
Balerini më i njohur shqiptar në Itali në një intervistë të dhënë Davide Di Santo-s për të përditshmen Il Tempo, thotë se në suksesin e Metës, që ka njohur personalisht verën e shkuar, gjen të reflektuar edhe pak prej historisë së tij.
Jeni i gëzuar për suksesin e Ermal Metës?
“Jashtëzakonisht. Gjej veten në të, në emocionet që besoj se po përjeton. Por jam shumë i gëzuar për të edhe pse është shqiptar si unë”.
Kënga flet pikërisht për emigrantë.
“Tregoi pjekuri të madhe. Kënga flet për njerëz të detyruar të lënë vendin e tyre, dhe përvoja që ka Meta e bëri më të vërtetë e më të natyrshëm interpretimin e tij”.
Sot debatohet shumë rreth ShBA-së, Evropës dhe terrorizmit.
“Moslejimi i hyrjeve nga vendet myslimane i vendosur nga presidenti Trump nuk është sinjal i mirë. E vërteta është se përditshmëria e njerëzve shpesh bie ndesh me zgjedhjet e politikavëve. Parmbrëmë për tri minutat magjike të këngës, jetuam në një botë pa kufij e pasaportë. Italianët vetë kanë qenë emigrantë, por të tillë jemi të gjithë, përpjekja për një jetë më të mirë është në natyrën e njeriut. Vetë Amerikën e bënë migrantët që të gjithë së bashku ndihmuan në ndërtimin e vendit të lirisë”.
Çfarë ju mungon nga Shqipëria?
“Gjithçka që lidhet me fëmijërinë time. Familja, miqtë, mësuesit. Këtu erdha 17 vjeç, pas akademisë së baletit. Shqiptarët ishin të parët, në 1991-shin, përmes të cilëve italianët njohën imigracionnin. Nuk ia mbathnim nga ndonjë luftë, por kërkonin lirinë. Tani njerëzit largohen nga vendlindja për një sërë arsyesh nga më të ndryshmet”.
Për t’iu kthyer festivalit, ç’ju pëlqen prej tij?
“Më pëlqen Fabrizio Moro dhe Fiorella Mannoia. Por mbi të gjithë Maria De Filippi. Është shumë e zonja edhe në rolin sanremez. Forca e saj është se di të përcjellë natyrshmëri dhe thjeshtësi”.
Mund të mos jeni i paanë, por a nuk ju duket se në Sanremo ka shumë këngëtarë që vijnë prej talent show?
“Ka të rinj që vijnë nga Amici e X Factor që përballen me Al Bano-n dhe Mannoia-n. Shumë mirë që ndodh kështu, Festivali ndryshon me vitet e është normale që të shkojë drejt shijeve të publikut”.
