“SPAK është Prokurori Speciale, që duhet të merret me korrupsionin, nuk është as KLSH dhe as auditi i Ministrisë së Financave. Ne kemi shumë respekt për prokurorët dhe drejtuesin e SPAK, por ato duhet të bëjnë detyrën. Ne po kërkojmë më shumë nga ky sistem që krijuam dhe e mbështesim”, tha Kryeministri Edi Rama në konferencën për mediat nga selia e Partisë Socialiste.
Rama tha se ka qenë kundër praktikave që partitë politike të bëjnë kallëzime në Prokurori, pasi ky është devijacion i madh.
“Por edhe ne kemi bërë kallëzime, siç ishte rasti i Taulant Ballës që ka shkuar dhe ka bërë kallëzime. Por nëse ne bëmë një Prokurori Speciale nuk e bëmë që të vijojmë të dëgjojmë që s´kemi kallëzime dhe nuk nisim çështjet penale. Çfarë kallëzime duan këta, kur DASH thotë hetoni “non gratat”. E dini ju se çfarë ndodh në botën demokratike? Bëhet hataja kur del dikush dhe bën një denoncim me fakte”, tha Rama.
Kryeministri tha se është një gjykatëse që na ka marrë pronën te Garda, ka 462 mijë euro të pajustifikuara, por çfarë pret Arben Kraja nga unë, çfarë denoncimi pret ai.
“Kam respekt për SPAK për goditjet që ka bërë në oborrin e PS. Kam respekt për Arben Krajën, pavarësisht nuk e njoh nga afër, por kam respekt. Ka bërë një rrugë lidhur me luftën ndaj krimit të organizuar. Është merita e Krajës dhe SPAK që dyert tona janë të hapura në Holandë”, tha ai.
