Kryeministri Edi Rama nga selia e PS i ka bërë thirrje SPAK që të çlirohet nga frika dhe të bëjë detyrën e tij, për të cilin ka mbështetjen e mbi 90 % të shqiptarëve.
“Nuk kam kërkuar dënim, por hetime, çfarë presioni është që të kërkosh më shumë? Unë po të isha cinik do isha shumë i lumtur kur përballë kam një njeri të vdekur politikisht dhe një tjetër që ia fut gjumit”, tha Rama.
Ai kërkoi nga SPAK hetimin e çështjeve që kanë tromaksur këtë popull dhe jo të mbahen të mbyllur me drejtësinë e re, ashtu sikundër ndodhi me atë të vjetrën.
“Të hetohet aferat financiare. Ish-Kryeministri Sali Berisha ka një “non grata”, e cila duhet të hetohet nga SPAK, sepse ka akuza të rënda. Ky nuk është presion, por një kërkesë legjitime”, tha Rama. Sipas tij, është e patolerueshme kur nga vetting janë nxjerrë jashtv sistemit me dhjetra e dhjetra gjyqtarë dhe prokurorë dhe askush prej tyre nuk hetohet.
Rama tha se ky është problem me investimin më të madh politik dhe moral që është bërë në këtë vend që është reforma në drejtësi dhe nuk ka lidhje fare me mua apo interesat politike tonat.
“Gurin e themelit e kemi vënë ne dhe nuk do të lejojmë që rëra e së kaluarës të mbulojë këtë gur”, tha Rama. Ai tha se nuk do i ndahemi as gjyqtarëve dhe as prokurorëve të shpallur të korruptuar nga Vetting.
