Kuvendi do të zhvillojë raundin e parë të zgjedhjes së Presidentit me 16 maj, në seancën parlamentare që do të nisë punimet në orën 17:00.
Kjo u vendos në Konferencën e Kryetarëve, ndërsa Kushtetuta parashikon zhvillimin e 5 raundeve, me një distancë kohore jo më shumë se 7 ditë nga njëri te tjetri.
Në 3 raundet e para, Presidenti mund të zgjidhet me shumicën e cilësuar të 84 votave, ndërsa në dy raundet e fundit mjafton shumica e thjeshtë prej 71 votash.
Duket se raundi i parë i votimit thjesht do të konsumohet pa një kandidat, procedurë kjo e ndjekur edhe më parë. Kjo duket se do të jetë loja e Kryeministrit Edi Rama në raport me opozitën, të cilën e ka ftuar në një proces negocimi, por duke vendosur kushte lidhur me personat që negocion. Kështu, Rama dhe përfaqësuesit e tij, nuk pranojnë negocime me atë që njihet si Komisioni i Rithemelimit, që de juro dhe de facto drejton Partinë Demokratike.
Në negociata, Rama ka përzgjedhur Enkelejd Alibeajn, i cili nuk gëzon mbështetjen e PD zyrtare, nuk ka asnjë mandatin për të përfaqësuar këtë parti, por ka mbështetjen e disa deputetëve, të cilët bashkë me socialistët dhe 3 të PSD së Tom Doshit arrijnë numrin 84 të votave për zgjedhjen e Kreut të Shtetit në 3 raundet e para.
Nga diskutimet që u bënë sot në Konferencën e Kryetarëve u artikuluan disa kërkesa të deputetëve të opozitës, sipas të cilëve Presidenti duhet të ishte një figurë politike, nuk duhej të kishte lidhje me sistemin diktatorial apo komunizmin, sikundër u tha se PS nuk mund të zgjidhte e vetme Kreun e Shtetit pasi nuk kishte legjitimitetin, për shkak se ka mbledhur vota nga persona që janë shpallur “non grata”.
Dhe nisur nga situata politike, ku Rama duket se do të vazhdojë atë që e konsideron si proces negociatash, me shumë gjasë për raundin e parë të votimit, thjesht do të konsumohet data, ndërsa nga drejtuesja e Kuvendit pritet të njoftohet në seancë se nuk ka një kandidat për President. Kjo mund të shërbejë si një periudhë ku të shtohet presioni ndaj grupimit të Alibeajt, për të vijuar atë që konsiderohet nga opozita zyrtare PD-LSI si farsa e Kryeministrit.
Sot në Konferencën e Kryetarëve, deputetja Flutura Açka, e shprehu qartazi qëndrimin e saj se Edi Rama tashmë e ka caktuar Presidentin e ri dhe thjesht po e përdor opozitën si një buzëkuq për tu dukur më e bukur dhe më europiane.
