Konferenca e Kryetarëve ka nisur mbledhjen ku do të përcaktohen datat e zhvillimit të procesit të votimit për Presidentin e ri, bazuar te raundet që parashikon Kushtetuta.
Taulant Balla, kreu i Grupit Parlamentar të PS, u shpreh se raundi i parë i votimit do të zhvillohet me 16 maj.
Ndërkohë deputetja Flutura Açka duke marrë fjalën u shpreh se mazhoranca socialiste e ka vendosur tashmë Presidentin, thjesht ju po përdorni opozitën si ai buzëkuqi që vihet për tu dukur më bukur.
“Uroj të mos dali fjala ime, por kam bindjen që kështu do të ndodhë, që ju thjesht po bëni një proces fasadë, pasi tashmë e keni zgjedhur atë, mbi gazën e dy kritereve: ose ti ketë shërbyer diktaturës, ose të jetë pinjoll i familjeve të diktaturës”, tha Açka.
Lidhur me zgjedhjen e Presidentit 5 vjet më parë, Açka tha se sot ju duhet ta kishit nisur procesin me një ndjesë publike ndaj shqiptarëve, pasi vetë e zgjodhët, vetë e shatë, vetë e çuat në Kushtetuese, dhe po vetë po i përgatisni funeralin politik atij që sot është President.
“Më lejoni të kthehem pas në kohë atëherë kur u zgjodh President Ilir Meta, më pas na doli pijanec. Ajo çfarë ndodhi 4 vite më parë na ka lënë shijen e keqe mënyrën si u zgjodh Presidenti i Republikës.
Çfarë ka ndodhur keni sharë, keni ngrënë ngjala me atë, e bëtë president, e ofenduat, e çuat në Kushtetuese, tani doni t’i bëni një funeral politike, ju duhet të kërkoni një ndjesë publike ndaj shqiptarëve për mënyrën se si ua zgjodhët Presidentin.
Me zarfat që keni hedhur, duhet t’ju kenë dalë nja 250 emra, a i ka Shqipëria nja 250 president, pse të mos ketë edhe nja 200 të tjerë rrotull trojeve tona. Prandaj unë shikoj që huqi nuk ka për t’ju lënë që të negocioni me ne. Unë kam frikë, jo kam frikë por kam bindjen sepse s’kam pse të kem frikë fare, ju nuk do të negocioni me ne.
Ju na keni ne këtu si buzëkuq për tu dukur më bukur në sytë e Evropës, që ja ku jemi dhe po evropianizohemi. Unë kam frikë se keni zgjedhur presidentin për të mos folur me emra. Për ju kandidat i mirë për president është ndonjë lëpirës dore”, u shpreh Flutura Açka.
