Një zjarr ka rënë në banesën e Fatmir Shehut në lagjen numër 5 në Memaliaj. Forcat zjarrëfikëse kanë shkuar në vendin e ngjarjes, ku kanë bërë të mundur nxjerrjen prej andej të katër pjesëtarëve të familjes.
Nga të dhënat e para mësohet se njëri prej pjesëtarëve të familjes ka pësuar djegie të lehta.
Pas nxjerjes nga banesa të gjithë personat janë dërguar në spitalin rajonal.
Sipas të dhënave të para, bëhet e ditur se shkak i rënies së zjarrit të ketë qenë një qiri i lënë i ndezur në dhomën e gjumit të njërit prej pjesëtarëve të familjes.
Ndërkohë, Fatmir Shehu kohë më parë ka humbur gjurmët, ndërsa katër personat e tjerë të kësaj familje vuajnë nga probleme të shëndetit mendor.
Si pasojë e zjarrit janë shkaktuar edhe dëme materiale. Nuk dihet se ku do të strehohen tashmë pjesëtarët e kësaj familje.
