Nënkryetari i Grupit Parlamentar të PD-së Luçiano Boçi ka treguar se si do vijojë procesi i votimit për kryetarin e ri, pasi deri tani vetëm ish-kryeministri Berisha ka zyrtarizuar pjesëmarrjen në garë.
I ftuar në RtvOra, deputeti Boçi tha se duhet të tregojmë durim deri nesër për të parë kush do të dalë përballë Berishës, por edhe nëse nuk do ketë garë, do kemi një referendum për pranimin e liderit demokrat si drejtues i PD-së nga anëtarësia.
Pjesë nga intervista:
Boçi: Dëshira është dhe e zotit Berisha që të ketë garë. Do të presim afatin e fundit të regjistrimit të kandidatëve dhe ky kuriozitet me interes për publikun do të shpaloset nesër dhe më pas do të shprehemi si do jetë. Por nëse është një kandidat, në këtë rast zoti Berisha, do ketë pamjen e një referendumi për pranimin e zotit Berisha si drejtues i PD nga vota e anëtarëve të PD.
Për Boçin sfida të tilla janë edhe më të vështira.
Boçi: Kur thashë referendum e shpreha në mënyrë figurative pasi ajo është garë dhe në optikën time garat janë më të vështira kur je vetëm sesa kur je me kundërshtar. Në këtë aspekt sensi i garës nuk bie, madje përgjegjësia për garën rritet dhe përgjegjësia për votën është më e madhe. Gara të tilla i kam provuar dhe ku ke përballë kundërshtarin gara është dhe më e lehtë dhe më e argumentuar. Pozita e vështirë shtohet kur je i vetëm përballë elektoratit apo votuesve.
Këshilli Kombëtar i PD-së votoi sot projekt-rezolutën për zgjedhjen e Presidentit, ku pritet të ngrihet një grup negociator.
Por ndërkohë mazhoranca vijon negociatat me Alibeaj dhe i ka mbyllur dyert Rithemelimit.
I pyetur sesi do ti imponohen PS, ai u përgjigj:
Boçi: Format e imponimit janë të shumta përmes qëndrimeve tona politike. Një nga fiormat e imponimit është formësuar sot derisa kemi konstituar Këshillin Kombëtar, kemi miratuar dhe rezolutën.Imponimi do të vazhdojë dhe më forma të tjera në raport me jetën parlamentare për të detyruar drejtuesit e parlamentit që të njohin sipas rregullave, sipas ligjit, grupin parlamentar të PD dhe përbërjen e tij në total dhe jo si është deri më tani i copëzuar apo përjashtuar. Në nivelin politik të marrëdhënieve ne kërkojmë bashkëpunimin dhe do të dimë shumë mirë të hapim dhe ato dyer që na mbyllen me të gjitha format politike që disponon një forcë e vërtetë opozitare.
Emra konkretë për Presidentin nuk kanë akoma, por kritere po.
Boçi: Në negociatën e parashikuar sipas projekt-rezolutës nëse do të jetë serioze dhe nëse PD dhe partitë e tjera opozitare do të kenë të drejtën e propozimit dhe procedura do të jetë serioze negociata do të vazhdojë dhe ne do të kemi detyrimin por edhe dëshirën për të paraqitur si të propozuar figura me integritet dhe që e meritojnë vërtet postin e Presidentit të Republikës. Do të ishte ai person që ka konsensus të gjerë pranueshmërie jo thjesht politike por ka integritet moral dhe profesional.
Edhe datë për nisjen e negociatave me partitë e tjera opozitare nuk ka akoma pasi më parë duhet të ngrihet grupit negociator.
Boçi: Nuk mund ta përcaktoj si datë derisa ende nuk është ngritur grupi negociator. Në projekt-rezolutë parashikohet që Komisioni i Rithemelimit do përcaktojë grupin negociator dhe më pas do ndiqet procedura datore në bashkëpunim me kampin opozitar dhe më pas duke vazhduar më tej me synimin dhe qëllimin për të ndërtuar një proces kushtetues. Presidenti duhet të jetë produkt i konsensusit politik. PD është serioze në qëllimësinë e saj dhe kërkon që ky proces të respektohet deri në fund sipas Kushtetutës dhe jo të bëhet pis, të jetë një proces tallës ku në fund fare pavarësisht çfarë ka ndodhur Rama ka në xhep emrin që mund të zgjedhë për president. Do përpiqemi me të gjitha mënyrat politike, qoftë të negociimit, të marrëveshjeve, që të prishim çdo projekt të Ramës për të kapur dhe institucionin e fundit të pakapur nga ai që është Presidenca. Rama do tentojë se është në siklet të madh me projektet që ka ai për legalizimin e kanabisit, Ballkanin e Hapur, kërkon një president kukull që mos të mos jetë pengesë qoftë dhe morale e iniciativave të tij. E ka provuar në lëkurë kur përballë ka pasur një President që i ka rezistuar qëllimësisë së tij të mbrapshtë ndaj të mirës së përbashkët të vendit.
Lidhur me zgjedhjen e kryetarit të ri të grupit parlamentar të PD pas shkarkimit të zotit Alibeaj në Kuvendin e 30 prillit do të duhet të presim zgjedhjen e nënkryetarëve të partisë.
Boçi: Nuk kemi diskutuar se procedura ëhstë e përcaktuar në statutin e PD ku një nga nënkryetarët është automatikisht kryetar i grupit parlamentar të PD.
