Sipas përllogaritjeve të Organizatës Botërore të Shëndetësisë afro 15 milionë persona kanë vdekur ose si pasojë e drejtpërdrejtë e COVID-19, ose për faj të mbingarkesës së sistemit shëndetësor gjatë dy viteve të fundit.
Kjo shifër është dyfish më e lartë sesa numri zyrtar i viktimave nga COVID-19 (6 milionë).
Metoda e ndjekur nga OBSH-ja për të përllogaritur vdekjet shtesë është duke nxjerrë diferencën midis numrit zyrtar të vdekjeve dhe shifrës së parashikuar në mungesë të një pandemie sipas të dhënave nga vitet e mëparshme.
Tek vdekjet shtesë hyjnë ata që kanë humbur jetën si pasojë e virusit COVID-19, por edhe personat që vuanin nga sëmundje të tjera por që kanë vdekur më pas në pamundësi të dhënies së shërbimeve shëndetësore, apo trajtimeve parandaluese për shkak të mbingarkesës së sistemit shëndetësor në shtetet e tyre përkatëse.
Organizata gjithashtu vërejti se përqendrimet më të larta të vdekjeve shtesë, rreth 84 për qind, ishin në Azinë Juglindore, Europë, dhe Amerikë.
81 për qind e vdekjeve shtesë janë regjistruar në vendet me të ardhura të mesme, 15 për qind tek shtetet me të ardhura të larta dhe 4 për qind në vendet me të ardhura të ulëta.
“Këto të dhëna të qarta jo vetëm pasqyrojnë pasojat e pandemisë, por edhe nevojën e shteteve për të investuar në ndërtimin e sistemeve shëndetësore më të forta, të cilat do të mund të përballonin dhënien e shërbimeve shëndetësore jetike në kohë krizash”, tha Dr. Tedros Adhanom Ghebreyesus, kreu i OBSH-së.
The total number of deaths associated with #COVID19 worldwide from 2020-2021 may be closer to 14.9 million: New estimates by WHO & @UNDESA.
That’s 9.5 million more deaths than reported https://t.co/qDvaA6t5KZ #HealthData pic.twitter.com/ZjABJzlgiZ
— World Health Organization (WHO) (@WHO) May 5, 2022
