Nga Boldnews.al
Një nga skemat që po zhvat shqiptarët është krijimi i disa zyrave me aktivitet tepër të dyshimtë, të cilat po mbledhin të ashtuquajturat “kredi të këqija”. Në fakt, nuk janë kredi të këqija, por “gjoba” që rëndojnë ndaj mijëra familjeve shqiptare, të cilat po detyrohen që të paguajnë kosto tepër të fryra.
Madje, duke paguar “përmbarues” fantazmë, apo edhe interesa absurde. Këto skema janë kallëzuar në prokurori, ku një nga më të dyshimtat ka qenë qendra “Star”, e cila funksiononte në afërsi të bulevardit “Zogu i Parë”. Kjo qendër u kallëzua në prokurori, nga Ministria e Drejtësisë, e cila është vetëm pak metra larg nga adresa e “Star”.
Por, pas kallëzimit, kjo qendër ndryshoi emër, njëhërë hiqeshin si përmbarues, njëherë si avokatë apo njëherë si financiarë apo institucion financiar. Një bashkim veprimesh për të humbur gjurmët.
Por, megjithëse kallëzimi është me emra personash apo me veprime konkrete, prokuroria e Tiranës ende nuk ka vendosur për fatin e këtij procedimi. Por, një nga të kallëzuarit, pikërisht z.Olsi Ibro, ka filluar një tjetër objekt, ku nga “zhvatja e kredive” ka kaluar në “zhvatjen e parave publike”. Dhe, ai që po i “rehabiliton” këta persona është Blendi Gonxhja, një tjetër i “rehabilituar”, i cili pas Bashkisë së Tiranës është zhvendosur te Drejtoria e Përgjithshme e Transportit Rrugor.
Sipas dokumenteve që disponon Boldnews.al, Drejtoria e Përgjithshme e Transportit Rrugor, e kryesuar nga Blendi Gonxhja, ka finalizuar tenderin “Konsultim, hartim, implementim dhe certifikim e sistemit dokumentar të menaxhimit të cilësisë sipas standartit ISO 9001:2015 dhe konsultimin, hartimimin, implementimin dhe përgatitjen për akreditim të trupës inspektuese sipas standartit ISO 17020 dhe standartit ISO 17024”.
Në këtë tendër kanë bërë oferta kompania “Re/Born” me vlerë 13.2 milionë lekë të reja dhe “TMC” me vlerë 12.2 milionë lekë. Kjo e fundit është s’kualifikuar me arsyetim se ka paraqitur një firmë mbështetëse që ska objekt dhe për një punonjëse. Dhe për këto “gjetje”, Gonxhja ka preferuar firmën që ka ofruar më shumë, përkatësisht 10 milionë lekë të vjetra më shumë.
Boldnews.al bëri një vëzhgim se kush qëndron pas firmës “Re/Born”, e cila rezulton se është krijuar në vitin 2017, me një kapital me vlerë 100 mijë lekë. Aksioner është z.Olsi Ibro me 51% të aksioneve dhe z.Abdulla Biçaku me 49% të aksioneve. Pra, ky i fundit, nga i kallëzuar nga Ministria e Drejtësise për “zhvatje të kredive”, ështe kthyer në një “zhvatës të parave publike”. Dhe, “rehabilitues” është pikërisht Blendi Gonxhja, drejtori që ka shtënë në dorë Drejtorinë e Transportit Rrugor, por që bizneset e bashkëshortes dhe gruas së tij po lulëzojnë në këtë kohë. Të jetë rastësi?
