Bankat refuzuan rreth 18.5% të aplikimeve për kredi në gjashtëmujorin e dytë të vitit të kaluar.
Sipas të dhënave të Bankës së Shqipërisë, norma e refuzimit ka shënuar rritje me 2.5 pikë përqindje krahasuar me gjashtëmujorin e parë të vitit, por paraqitet në rënie të lehtë rënie të lehtë krahasuar me të njëjtën periudhë të një viti më parë dhe kjo rënie vërehet në të gjitha ndarjet sipas llojit të klientelës.
Analiza e Bankës së Shqipërisë konfirmon diferenca të mëdha në shkallën e refuzimit të aplikimeve për kredi nga bankat me kapital vendas krahasuar me bankat me kapital të huaj. Gjatë gjysmës së dytë të vitit 2021, norma totale e refuzimit të aplikimeve për kredi nga bankat me kapital vendas ka rënë në 6.2%, nga 8.3% një 6-mujor më parë. Ndërsa për bankat me kapital të huaj kjo normë është rritur në 27%, nga 21.1% e raportuar në 6-mujorin e kaluar.
Kjo e dhënë konfirmon faktin se bankat me kapital vendas në përgjithësi janë më të prirura për të rritur huadhënien dhe për të fituar pjesë tregu. Megjithatë, në një masë të caktuar, shkalla më e lartë e refuzimit te bankat e huaja mund të shpjegohet edhe me numrin më të madh të apikimeve që ato marrin, për shkak të pjesës më të madhe të tregut dhe numrit më të lartë të klienëtve.
Sipas segmenteve të klientelës, bankat e huaja mbeten më të prirura për të kredituar segmentin e ndërmarrjeve, veçanërisht ndërmarrjet e mëdha dhe norma e refuzimit për këtë grup ndërmarrjesh ka rënë ndjeshëm gjatë dy viteve të fundit. Nga ana tjetër, norma e refuzimit kundrejt segmentit të individëve ka shënuar rritje për grupin e bankave të huaja dhe rënie për grupin e bankave me kapital vendas. Kjo e dhënë dëshmon se bankat me kapital vendas janë më të interesuara për segmentin e individëve, ndërsa ato të huaja preferojnë më shumë segmentin e biznesit, ku huatë në vlera mesatare janë më të mëdha.
Për shembull, në segmentin e individëve bankat me kapital vendas refuzuan vetëm 6.1% të aplikimeve për kredi, ndërsa bankat me kapital të huaj refuzuan 28.3% të totalit të aplikimeve. Por, në segmentin e biznesit dhe sidomos koporatave raportet ndryshojnë ndjeshëm. Bankat me kapital të huaj kanë refuzuar vetëm 1.4% të aplikimeve për kredi, ndërsa bankat me kapital vendas kanë një shkallë refuzimi 6.1%. Lehtësimi i masave kufizuese të pandemisë dhe rimëkëmbja e aktivitetit ekonomik në vend pas rifillimit të punës në sektorët e prekur, ka vijuar të ndikojë pozitivisht prirjen kredituese të bankave, veçanërisht ndaj grupit të ndërmarrjeve të mëdha.
Gjatë gjashtëmujorit të dytë 2021, bankat kanë raportuar se kanë marrë në shqyrtim gjithsej 67,126 aplikime për kredi, nga të cilat 7% i përkasin sektorit të biznesit dhe 93% i përkasin sektorit të individëve. Krahasuar me një vit më parë, kjo strukturë ka shënuar një zhvendosje të lehtë në favor të klientëve individë. Numri total i aplikimeve për kredi të shqyrtuara nga bankat ka shënuar një rritje të lehtë krahasuar me gjashtëmujorin e kaluar, por ka rënë me rreth 21% krahasuar me një vit më parë. Rënia në terma vjetorë ka ardhur nga segmenti i ndërmarrjeve të vogla dhe të mesme dhe individët, ndërkohë që numri i aplikimeve të shqyrtuara nga kategoria ndërmarrje të tjera, ku mbizotërojnë ndërmarrjet e mëdha, ka rezultuar në rritje. /MONITOR
