Kuvendi i Partisë Demokratike ka mbyllur punimet pas më shumë se 8 orësh, ndërsa delegatët kanë votuar për 150 anëtarët e Këshillit Kombëtar, që do i bashkohen anëtarëve deputetë dhe drejtuesve të degëve.
Vendimi më i rëndësishëm mund të konsiderohet caktimi i datës së zgjedhjeve për kryetarin e ri të PD-së, që do të jetë data 22 maj.
Gjithashtu, Kuvendi vendosi shkarkimin e Enkelejd Alibeajt si kryetar i Grupit Parlamentar. Kuvendi të demokratëve iu bashkuan Jozefina Topalli e Arben Imami, Rudina Hajdari e Myslym Murrizi, ndërsa i pranishëm si i ftuar ishte edhe Martin Henze, i cili prej kohësh është shfaqur si një prej mbështetësve të Komisionit të Rithemelimit në përballjen me atë që njihej si grupi i Lulzim Bashës.
Kuvendi i PD u përshëndet përmes video-mesazheve nga të rinjtë e EPP, grupimit më të madh politik në Parlamentin Europian, por edhe nga koservatorët europianë të përfaqësuar nga Georgina Meloni.
Në Kuvend theksi u vu në bashkimin e PD, ndërsa nga zërat e pakët kritikë ishte ai i Fatbardh Kadillit, i cili kërkoi nga Berisha që ti hapte rrugën brezit të ri në PD. Ajo që tërhoqi vëmendjen ishte se fjalimi i Kadillit u shoqërua me një largim të delegatëve nga salla, gjë që me nota humori u vu re edhe nga i mirënjohuri Bujar Kapexhiu, që u shpreh se fatkeqësisht i ra rradha të fliste pas kadillit, me një sallë pothuajse të boshatisur.
Fotot e mëposhtme tregojnë disa nga momentet pikante në punimet e Kuvendit të PD, ku tërheq vëmendjen takimi mes ish-kryeministrit sali Berisha dhe ish-Kryeparlamentares, Jozefina Topalli, e cila u largua nga PD në 2017.
