Për ambasadën amerikane në Tiranë, Enkeljd Alibeaj dhe Gazmend Bardhi janë drejtues të Partisë Demokratike.
Të Enjten dhe këtë të Premte, në Tiranë ishin Ndihmës Sekretarja e Shtetit për Çështjet Europiane dhe Euroaziatike Karen Donfried dhe Zëvendës Ndihmës Sekretari i Shtetit dhe i Dërguari i Posaçëm për Ballkanin Perëndimor Gabriel Escobar. Në një njoftim, ambasada amerikane shpjegon se ata u takuan me “Kryeministrin Edi Rama, ministra të ndryshëm, dhe drejtuesit e opozitës”.
Nga “opozita”, zyrtarët amerikanë zhvilluan një takim në ambientet e Kuvendit me Enkelejd Alibeajn, Gazment Bardhin dhe Jorida Tabakun. Ndërkohë, u anashkalua vizita në selinë blu dhe takimi me përfaqësues të “Rithemelimit” që sipas një vendimi të gjykatës së Tiranës, drejton Partinë Demokratike.
Një qëndrimi i ngjashëm është mbajtur disa javë më parë dhe nga ambasadorja amerikane Yuri Kim, e cila pas një takimi me Enkeljed Aibeajn, e quajti “drejtues të komanduar të PD-së”.
Në reagim, postohen foto nga takimi i zyrtarëve amerikanë me Ramën dhe të përzgjedhurit e tij, si dhe nga takimi me Alibeajn, Bardhin e Tabakun.
“Si pjesë e vizitës së saj në Ballkanin Perëndimor, Ndihmës Sekretarja e Shtetit për Çështjet Europiane dhe Euroaziatike Karen Donfried dhe Zëvendës Ndihmës Sekretari i Shtetit dhe i Dërguari i Posaçëm për Ballkanin Perëndimor Gabriel Escobar ishin në Shqipëri në 28 dhe 29 prill. Ata u takuan me Kryeministrin Edi Rama, ministra të ndryshëm, dhe drejtuesit e opozitës. Qëllimi i vizitës së tyre ishte thellimi i partneritetit tashmë të fortë midis Shteteve të Bashkuara dhe Shqipërisë si miq, aleate në NATO dhe anëtare në Këshillin e Sigurimit së Kombeve të Bashkuara, sidomos teksa festojmë 100-vjetorin e marrëdhënieve tona dypalëshe. Ata rikonfirmuan mbështetjen e Shteteve të Bashkuara për anëtarësimin e Shqipërisë në Bashkimin Europian dhe nxitën vijimin e reformave të nevojshme, përfshirë reformën në drejtësi; mirëpritën përpjekjet e fundit për të diversifikuar burimet, furnizimet dhe rrugët e energjisë në Shqipëri dhe më gjerë në rajon; dhe nënvizuan se Shtetet e Bashkuara do të vazhdojnë luftën kundër korrupsionit si një interes thelbësor i sigurisë kombëtare të Shteteve të Bashkuara. Ata theksuan gjithashtu rolin e pazëvendësueshëm të një opozite të fortë në demokracinë e Shqipërisë, theksuan rëndësinë e institucioneve të forta demokratike dhe sundimit të ligjit dhe shprehën shpresën për një partneritet të efektshëm dhe që sheh përpara me popullin shqiptar, duke përfshirë edhe partitë që i përfaqësojnë ata”, është njoftimi i plotë i ambasadës amerikane.
