Një i ri është dënuar me 10 muaj burg, pasi ka shantazhuar në rrjete sociale një vajzë, pasi kjo e fundit kishte refuzuar të bëhej e dashura e tij.
20-vjeçari, Daniel Xhepa, me sa duket nuk e ka duruar refuzimin që i ka bërë një 19-vjeçare për të patur një lidhje dashurie mes tyre.
Ndaj ai ka nisur përndjekjen ndaj vajzës dhe për ta detyruar atë të pranonte lidhjen, ka nisur ta shantazhojë duke i vjedhur profilin në Facebook.
Mësohet se pasi ka marrë nga profili i vajzës foto dhe biseda që ajo kishte patur me njerëz të ndryshëm ka nisur t’i publikojë ato në rrjetin social. Duke parë refuzimin e vajzës, 20-vjeçari ka nisur që të publikojë edhe tekste denigruese dhe fyese ndaj 19-vjeçares.
Vajza fillimisht nuk e ka denoncuar këtë lloj përndjekje pasi druhej nga reagimi i prindërve, por kanë qenë familjarë të saj, që pasi kanë paëe statuset në rrejtin social, e kanë bindur që ta denoncojë.
Pas kësaj Xhepa është arrestuar nga policia, ndërsa gjatë hetimit dhe gjykimit i vënë përballë provave të pakundërshtueshme, që vetë i kishte fabrikuar në rrjetin social Facebook, nuk i mbeti gjë tjetër vetëm të pranonte akuzën.
