Sekretari amerikan i Shtetit, Antony Blinken tha se SHBA po merr në shqyrtim çështjen nëse Rusia do të duhet të përfshihet apo jo në listën e vendeve që mbështesin terrorizmin.
Blinken në seancën e buxhetit në Senat bëri vlerësime lidhur me luftën Rusi-Ukrainë.
Ndaj pyetjes së senatorit republikan Lindsey Graham se “a mendoni të vendosni Rusinë në listën e vendeve që ofrojnë mbështetje për terrorizmin?, Blinken dha përgjigjen se “këtë po e shikojmë juristët tanë dhe po e vlerësojnë çështjen për t‘u siguruar që një proces i tillë është në përputhje me ligjin përkatës”.
Graham bëri të ditur se Rusia tani po shkakton shkatërrime edhe në Ukrainë, pas Sirisë.
Ai u shpreh më tej se i gjithë Senati do të japë mbështetje të plotë për çdo hap që administrata Biden do të ndërmarrë për këtë çështje dhe se Rusia duhet të përfshihet sërish në listën e vendeve që mbështesin terrorizmin.
Presidenti i Ukrainës, Volomyr Zelenskyy, më parë ka kërkuar nga presidenti amerikan, Joe Biden që të shtojë “Rusinë në listën e vendeve që mbështesin terrorizmin”, ndërsa është raportuar se presidenti Biden nuk ka dhënë një përgjigje të qartë për këtë kërkesë.
Ndërkohë, zëdhënësi i Departamentit Amerikan të Shtetit, Ned Price ka deklaruar se janë duke e vlerësuar këtë çështje.
/ata/
