Një 39-vjeçar është arrestuar nga policia e Tiranës, pasi akuzohet se vidhte bizhuteri dhe më pas i shiste.
Në pranga u vu G.D., 39 vjeç, banues në Laknas, për veprën penale “Vjedhja”, i dënuar më parë po për këtë vepër penale.
“G.D. është kapur në flagrancë nga shërbimet e Policisë, në vendin e quajtur ‘Dollari’, duke shitur bizhuteri të cilat i kishte vjedhur në banesën e shtetasit S.R.”, njoftoi policia.
Nga veprimet hetimore të kryera ka rezultuar se ky shtetas kryente vjedhje në banesa, në zonën e Kombinatit, Paskuqanit dhe në zona të ndryshme të Tiranës dhe më pas sendet e vjedhura i shiste në vendin e quajtur “Dollari” dhe në një argjendari në Kamzë, shtuan të njëjtat burime.
Po ashtu, u procedua penalisht pronarja e argjendarisë në Kamzë, N.Z., 58 vjeçe, banuese në Kamzë, për veprën penale “Përvetësimi i parave ose mallrave që rrjedhin nga vepra penale ose veprimtaria kriminale”.
Gjatë kontrollit, shtetasit G.D. iu gjetën 11 ora të dyshuara të vjedhura, ndërsa shtetases N.Z. iu gjetën 5 unaza dhe 2 varëse floriri, të cilat u sekuestruan në cilësinë e provës materiale.
