Kryeopozitari Lulzim Basha ka ftuar biznesin gjerman të investojë në vendin tonë. Në fjalën e tij Basha teksa ka akuzuar qeverinë aktuale se ka rritur taksat me 1.5 miliard dollarë, ka prezantuar disa nga pikat e progamit të PD, nëse kjo forcë politike vjen në pushtet më 18 qershor.
“Në këto vite të qeverisë Rama, taksat janë rritur me 1.5 miliardë dollarë. Çdo shqiptar është detyruar që të paguajë 500 dollarë më shumë gjatë viteve të kësaj qeverie.
Ne do të ulim taksën e sheshtë. Do heqim tatimin mbi dividentin. TVSH do të ketë një shkallë të vetme tatimore prej 15%. Tatimi i biznesit të vogël do të jetë kuote fikse, 1,5 % të xhiros e cila do të zëvendësoje tatimin mbi të ardhurat dhe TVSH.
Paratë e taksave, në shërbim të taksapaguesit”, tha Basha, duke premtuar se ndër premtimet e tij të para “do të jetë edhe rritja e ndihmës ekonomike”.
“Abuzimet e qeverisë me investime në zyra, makina, buzëkuqë etj, i kanë kushtuar buxhetit të shtetit 310 milionë dollarë. Këto investime do të bëhen zero dhe këto para do investohen për qytetarët”.
“Rritja e taksave dështim i qeverisë Rama. Qeveria e parashtroi që në fillim dështimin e vet. Produkti ynë, do të jetë realist”, tha ndër të tjera Basha.
