Ekspertët e hetimit dhe të Policisë së Suedisë kanë shfaqur një shqetësim të madh në lidhje me vjedhjet e sendeve me vlerë në vendin e tyre dhe më pas shitjen e tyre në vendet e Ballkanit e kryesisht në Shqipëri.
Të dhëna mjaft interesante dalin nga reagimet e kryepolicit dhe të një prokurori suedez, të cilët tregojnë mekanizmin që përdorin vjedhësit për ta kryer këtë akt, me kamionë dhe trajlera.
Janë mediat suedeze që kanë hedhur dritë mbi mënyrën sesi vidhen telefonat dhe laptopët në vendin e tyre. Kështu thuhet se kamionë të mbushur me celularë dhe laptopë, të cilët po vidhen në Suedi, janë kthyer në shqetësim të madh në vend.
Media e njohur “Svt.se” raporton se celularët dhe laptopët shiten në vendet e Ballkanit, kryesisht në Shqipëri, Serbi dhe Kroaci. Rasti në fjalë ka të bëjë me grabitjen e një kamioni në shkurt të vitit 2021.
Ngarkesa e cila vinte nga Europa Juglindore, zbuloi se telefonat celularë përdoren në Kroaci, Serbi dhe Shqipëri. Sipas Policisë suedeze, dëmi i kësaj vjedhjeje shkon deri në 600 milionë SEK ose përafërsisht 58 mln euro në vit. Një muaj më vonë, i njëjti kamion ngarkohet me 100 laptopë të vjedhur nga një kamion tjetër në Suedi.
“Ne shohim një qarkullim shumë të shpejtë të mallrave që nga momenti kur ato vidhen, vijnë në qendrën e pritjes, ku një kamion nga vendet e tjera ngarkohet dhe bëhet gati për të dalë jashtë vendit”, u shpreh prokurori Marten Alvinsson.
Deri më tani, bëhet me dije se janë rreth 20 persona të dyshuar në të gjitha nivelet që nisin me vjedhjet celularëve, laptopëve dhe apo edhe videolojërave. “Njerëzit e zakonshëm duhet të mendojnë se çfarë mallrash blejnë, nga kush blejnë dhe në çfarë rrethanash”, thotë prokurori i dhomës Marten Alvinsson.
“Nëse e blini në një parking, nëpërmjet Blocket ose Tradera, duhet të pyesni veten: Kush është personi që takoj? Është shumë e rëndësishme të kontrolloni përpara se të blini diçka”, thotë Mikael Bjork, drejtuesi i Policisë suedeze.
