Një aksident me pasojë vdekje ka ndodhur paraditen e sotme në kryqëzimin e Drithas, në Maliq. Kujtim Hazizi, i cili ishte këmbësor, raportohet se u përplas nga një automjet tip Benz, i cili drejtohej nga shtetasi Lorenc Toma. Si pasojë e përplasjes, Hazizi ka marrë plagë të rënda dhe megjithëse është transportuar drejt spitalit të Korçës, nuk ka mundur të mbijetojë.
“Maliq/Informacion paraprak
Më datë 24.04.2022, rreth orës 11:00, jemi njoftuar se në aksin rrugor Korçë-Pogradec, në afërsi të kryqëzimit të fshatit Drithas, Maliq, shtetasi L. T., banues në fshatin Rëmbec, Maliq, duke drejtuar mjetin tip “Benz” ka aksidentuar këmbësorin K. H., banues në Rëmbec, i cili u transportua për mjekim në Spitalin e Korçës, ku ka ndërruar jetë.
Drejtuesi i mjetit L. T., u shoqërua në Komisariat për veprime të mëtejshme.
Grupi hetimor po punon për sqarimin e rrethanave dhe përcaktimin e shkakut të aksidentit.
