Tërmeti me magnitudë 5.6 i shkallës Rihter, i cili goditi zonën e Stolacit në orën 23:08, është shumë i ngjashëm me atë që goditi Petrinjën dhe Banijën dhe është më shkatërrues se ai i Zagrebit, tha për “Jutarnji list” sizmologu kroat Tomislav Fiket.
Sipas tij, ky tërmet në Bosnje dhe ai i Petrinjës kanë ndodhur në një thellësi prej rreth 10 kilometrash dhe dallimi kryesor është në pasojat e tij.
“Për shkak të llojit të depozitave të thella të tokës, pasojat në Hercegovinë janë shumë më të lehta se në Petrinja dhe në pjesën tjetër të Banijës. Në zonën e Petrinjës, në thellësi, toka përbëhet nga depozitime aluviale, gjegjësisht dhera të lirshme, që sjell efektin e intensifikimit të tërmeteve. Në Hercegovinë, toka është një shkëmb me shtresa për nga thellësia, prandaj pasojat në sipërfaqe janë akoma më të vogla”, thekson Fiket.
Pra në thelb, përbërja shkëmbore e tokës, sipas tij, e shpëtoi Bosnje Hercegovinën nga pasoja të rënda.
“Në raport me tërmetin e Zagrebit, ky tërmet është shumë më shkatërrues, por pasojat për shkak të numrit të vogël të popullsisë janë shumë më të vogla”, shtoi po ashtu Fiket.
“Deri tani kemi regjistruar rreth 40 pasgoditje, por janë shumë më pak të fuqishme nga sa prisnim”, tha Fiket.
Sipas tij, toka do të vazhdojë të dridhet për një kohë të gjatë, por pret që të zgjasë më pak se sa ishte në zonën e Petrinjës. Fiket tregon se ky tërmet i fundit i përket kategorisë së tërmeteve shkatërrues, por nuk do ta klasifikonte ndër tërmetet më të fortë shkatërrues.
Tërmeti është ndjerë në gjithë Ballkanin si dhe në Itali. Në disa zona të vendit tonë, përfshirë Tiranës dhe Durrësin, lëkundjet u ndjenë të forta.
