Ish-deputeti Lefter Maliqi shprehet se kryeministri Edi Rama po sulmon Sali Berishën për të mbajtur opozitën të përçarë. Sipas Maqliqit, kjo lëvizje e Ramës bëhet pasi kryeministri e di se opozita e bashkuar e mund në zgjedhjet e ardhshme parlamentare.
“Bashkimi i opozitës e çon opozitën në fitore dhe kjo është një frymëmarrje për demokracinë”, tha Maliqi për “Faxweb”. Me bashkim të opozitës, ai iu referua një koalicion mes Berishës, Metës – që sipas tij do të jetë në krye të LSI pas përfundimit të mandatit si President dhe aleatët.
Maliqi thotë se nëse në zgjedhjet lokale që janë vitin e ardhshëm, opozita del fituese në 20 prej tyre, atëherë kjo do të përkthehet në përmbysje të pushtetit në zgjedhjet vijuese parlamentare. Ish-deputeti tha se pakënaqësia qytetare ndaj qeverisjes është e madhe.
Por, sipas Maliqit, opozita do të marrë të paktën 30 bashki në zgjedhjet lokale.
Maliqi u shpreh se me në krye Bashën, PD ishte një opozitë false. “Është e kundërta tani me bashkimin e madh opozitar që do të ndodhë”, deklaroi ai.
“PD ka 35% – 40% (të votave), LSI ka 10% dhe pjesa tjetër”, shtoi ai.
Procedurën e PS-së lidhur me konsultimet për zgjedhjen e Presidentit të ri, Maliqi e cilësoi një “show mediatik”. Sipas tij, Rama ka kohë që e ka zgjedhur Presidentin dhe cilido që do të jetë ai, do të jetë një kukull e Ramës.
