Një emigrant nga Shqipëria, gjeti fundin e jetës së tij, në përpjekje për të nxjerrë bukën e gojës në një fshat të Filatit në Igumenicë, pjesë e qarkut të Thesprotisë në Greqi.
Viktima është 50-vjeçar dhe ishte duke punuar për rehabilitimin e një kanali kullues në fshatin Nea Selevkia.
Policia lokale, tha se punëtori shqiptar, befas u përpi nga një sasi e madhe dheu dhe balte, teksa ishte në punë e sipër për hapjen e kanalit kullues.
Në vendin e ngjarjes shkuan forca policore dhe ekipe shpëtimi, por asgjë nuk u arrit të bëhej për ta shpëtuar burrin shqiptar që humbi jetën në mënyrë të dhimbshme, nën dheun që e zuri.
Autoritetet thanë se dërguan trupin e të ndjerit në morgun e spitalit të Filatit, pasditen sotme, pak pas tragjedisë.
