Deputeti i PS Ornaldo Rakipi, njëkohësisht djali i Aqif Rakipit të shpallur “non grata” nga SHBA së fundmi, nuk përjashtohet nga grupi parlamentar socialist.
Këtë të Martë, grupi parlamentar socialist zhvilloi një mbledhje dhe diskutimi për përjashtimin e mundshëm të Ornaldo Rakipit ishte pjesë e pjesë e rendit të ditës. Sipas raportimeve mediatike, që i referohen burimeve brenda mbledhjes së grupit parlamentar të PS, deputetët kanë rënë dakord që Ornaldo Rakipi të mos përjashtohet. Referuar të njëjtave burime, nga ligjvënësit është argumentuar se “përgjegjësia është personale”. Pra sipas tyre, Ornaldo Rakipi nuk ka përgjegjësi për veprimet e të atit.
Aqif Rakipi, ndërkohë, cilësohet nga autoritetet amerikane si pjesë e një grupi kriminal me ndikim destabilizues në proceset politike.
“Aktorët kriminalë mbeten me ndikim në politikën shqiptare, duke përdorur para dhe dhunë për të kanalizuar mbështetjen për kandidatët e preferuar… Aqif Rakipi është një ish-deputet famëkeq nga Elbasani, i cili ka një ndikim dëmtues dhe destabilizues në proceset politike në Shqipëri”, thotë Departamenti amerikan i Thesarit.
“Rakipi ka qenë prej kohësh i përfshirë në krimin e organizuar dhe është i lidhur ngushtë me një Grup të Krimit të Organizuar, brenda së cilit ai ka ushtruar ndikim politik, përfshirë edhe korrupsionin. Për shembull, Rakipi ka përdorur ndikimin e tij politik për të emëruar miqtë e tij në postet kryesore publike në Elbasan dhe Tiranë”, thuhet më tej në njoftim.
Ndërsa ish-deputeti Rakipi u përjashtua nga parlamenti për shkak të ligjit të dekriminalizimit, djali i tij Ornaldo Rakipi u përfshi në listat e kandidatëve socialistë për Tiranën në zgjedhjet e fundit, ku mundi të zgjidhej deputet falë një numri të lartë votash personale që arriti të mbledhë, duke thyer herësin.
