Francesko Beccetti, i dënuar me 17 vite burg nga Gjykata e Tiranës, ka ankimuar vendimin e shkallës së parë duke kërkuar pafajësi. Ankim kanë dorëzuar edhe të pandehurit e tjerë. Çështja pritet të regjistrohet në Gjykatën e Apelit.
Në Shkurt, Gjykata e Tiranës dënoi me 17 vite burg në mungesë biznesmenin italian Francesco Becchettin, i cili akuzohet se përmes kompanive të tij kishte krijuar një skemë të mashtrimit me TVSH dhe pastrim parash. Becchetti u akuzua për 4 vepra penale “Vjedhje duke shpërdoruar detyrën”, “Pastrimi i produkteve të veprës penale ose veprimtarisë kriminale”, “Falsifikim Dokumentesh”, “Krijimi i skemave mashtruese lidhur me Tatimin mbi Vlerën e Shtuar”. Edhe Bashkëpunëtori i tij italian, Mauro De Renzis, u dënua me 16 vite burg ndërsa e ëma e Becchettit, Liliana Condomitti, me 8 vite heqje lirie. Me 8 vite burg u dënua dhe Erjona Troplini, ndërsa Stavri Peçi dhe Fetah Dervishi janë dënuar me shërbim prove për shkak të moshës. Gjykata ka vendosur edhe që 4 kompanitë e sekuestruara Becchettit, konkretisht për “Energji” sh.p.k. “Cable System” sh.p.k, “400 KV” sh.p.k dhe “Agon Set” sh.p.k i kalojnë shtetit.
Biznesmeni prej kohësh është një temë debati politik në Shqipëri, pasi fitoi në arbitrazh ndërkombëtar rreth 130 milionë euro nga shteti shqiptar, i cili i sekuestroi pasuritë përfshi televizionin “Agon” në vitin 2015. Qendra Ndërkombëtare për Zgjidhjen e Mosmarrëveshjeve të Investimeve (ICSID) një gjykatë arbitrazhi, pjesë e Bankës Botërore, e dënoi Shqipërinë në prill të vitit 2019 duke gjykuar se mbyllja e televizionit ishte “motivuar politikisht”.
Pavarësisht premtimeve publike të kryeministrit Edi Rama dhe shpurës së tij qeveritare, se italiani “s’do marrë anjë lekë”, Beccetti ka nisur konfiskimin e parave të qytetarëve shqiptarë.
