Ish-Kryeministri Sali Berisha deklaroi në emisionin “Çim Peka Live” se padiskutim që shumica e deputetëve njohin Kuvendin e 11 dhjetorit dhe rezultatin e 6 marsit.
Berisha u pyet nëse shumica e Grupit Parlamentar e mbështet ose jo dhe përse nuk e shkarkon Enkelejd Alibeajn si Kryetar, ndërsa u shpreh se “kjo është një procedurë që do të zgjidhet nga Këshilli Kombëtar i PD, që do të zgjidhet nga Kuvendi i 30 prillit”.
“Kreu i Grupit Parlamentar do të zgjidhet nga Këshilli Kombëtar, pasi statuti i PD parashikon që një nga nënkryetarët e PD është edhe Kryetar Grupi. Ajo që mund të them unë është se Alibeaj ka mbështetjen në grup aq sa numërohen me gishtat e dorës.
Ne nuk e njohim Alibeajn si Kryetar të Grupit Parlamentar, por gjithçka do të zgjidhet përmes statutit, duke ngritur strukturat e reja, fillimisht Këshillin Kombëtar, i cili zgjedh edhe nënkryetarët, Sekretarin e Përgjithshëm, Kryesinë dhe Sekretarët”, tha Berisha.
