Sekuestrohen rreth 9 kg marijuanë në kufirin greko-shqiptar. Operacioni nga policia greke në zonën e Kosturit. Është ndaluar një automjet që vinte nga kufiri i gjelbër dhe gjatë kontrollit në të janë gjetur dhe sekuestruar 4 pako që përmbanin 8 kg 140 gram marijuanë.
Në mjet janë arrestuar drejtuesi shqiptar 49 vjeç dhe pasagjeri shqiptar 34 vjeç. Siç rezultoi ky i fundit kishte kaluar ilegalisht kufirin dhe po transportohej për në brendësi të tokës greke nga drejtuesi i mjetit. Gjatë kontrollit personal, pasagjerit i janë gjetur dhe sekuestruar 31 kokrra që përfshihen tek ligji për narkotikët.
Gjatë kontrollit të ushtruar në banesën e drejtuesit të mjetit në Selanik, janë gjetur dhe sekuestruar 637 gram marijuanë dhe 1 peshore elektronike. Dy të arrestuarve u janë sekuestruar edhe 2 celularë e 4 karta SIM si dhe automjeti në të cilin u kapën.
