Trëndafila të bardhë, qirinj, disa sende personale dhe mesazhe dashurie, janë lënë nga familjarët dhe kalimtarët në vendin e ngjarjes ku humbi jetën 17-vjeçari shqiptar që tronditi Kefaloninë.
Sipas mediave greke, miqtë dhe shokët e klasës së Fabios lanë një “copë” të tyren në vend, në shenjë dashurie për 17-vjeçarin që humbi jetën kaq padrejtësisht, viktimë e një tjetër aksidenti tragjik automobilistik.
Lamtumirën e fundit Fabios do t’i thonë të gjithë ata që e njohën dhe e donin, nesër të enjten në orën 15:00, në Kishën e Shenjtë Metropolitane të Argostolit.
Fabio u gjend pasditen e së martës i djegur në makinë ndërkohë që është ndaluar shoferi i saj, një 19-vjeçar i cili ishte shoku i tij. 19-vjeçari, i cili u arrestua nga policia pas ngjarjes tragjike, përballet me akuzën e vrasjes nga pakujdesia.
Sipas informacioneve, ai ishte shok i 17-vjeçarit dhe kishte udhëtuar nga Anglia ku jetonte, për ta parë. Sipas të njëjtave burime, mjeti fatal ka qenë në emër të babait të 19-vjeçarit, ndërsa ai kishte patentë drejtimi.
